‘नासाका’ सुरू व्हावा यासाठी पुन्हा हालचाली सुरू 

नाशिक : नाशिक जिल्हा मध्यवर्ती सहकारी बँक आणि पुणे येथील एस. एस. बी. एम. इंडिया शुगर इंडस्ट्रीज लि. जुन्नर पुणे यांच्या प्रयत्नातून चालू वर्षी गाळप हंगाम चालू व्हावा यासाठी प्रयत्न करण्यात येत आहेत. याच अनुषंगाने नाशिक सहकारी साखर कारखाना सुरू व्हावा याकरिता जिल्ह्यातील सर्व कामगार, शेतकऱ्यांची बैठक कारखाना कार्यस्थळावर रविवारी (ता. ११) आयोजित करण्यात आली होती. या प्रसंगी कामगारांनी एकमताने मागणी करून सकारात्मक भूमिका जाहीर केली.

नाशिक जिल्हा मध्यवर्ती बँकेचे अध्यक्ष केदा आहेर यांनी कामगारांकरिता सुप्रीम कोर्टात दाखल केलेले व जमा रकमेतून कामगारांची प्रोव्हिडंट फंडाची व सोसायटीची रक्कम देण्यात येणार असल्याच्या प्रस्तावाचे कामगारांनी स्वागत केले. बँकेने संबंधित कंपनीला लवकर पत्र देऊन कळवावे, अशी संघटनेने भूमिका मांडून स्पष्ट केले. यानंतर चार तालुक्यांतील सर्व शेतकरी, ऊस उत्पादक याचा नासाकाला कायम पाठिंबा असेल अशी घोषणा केली. सभेच्या अध्यक्षस्थानी संघटनेचे अध्यक्ष विष्णूपंत गायखे होते. 

या वेळी मृत कामगारांना श्रद्धांजली वाहण्यात आली. स्वागत शिवराम गायधनी यांनी केले. कामगारांमधून पंडित सोनवणे, सुभाष हुळहुळे, बबनराव कांगणे, चंद्रभान कोंबडे, ज्ञानेश्वर गायधनी, गणपत कानडे, पूजा फोकणे यांनी चर्चेत सहभाग घेतला. नासाका बचाव कृती समितीचे अध्यक्ष विलास गायधनी यांनी ऊस उत्पादक, शेतकरी, कामगारांच्या दृष्टीने कामगार संघटनेने योग्य निर्णय घेतला. त्याबद्दल नासाका बचाव कृती समितीच्या वतीने अभिनंदन केले. 

श्रीकांत गायधनी, सोमनाथ रोकडे, अविनाश गायधनी, तुषार गायधनी या प्रसंगी सेवानिवृत्त कामगार संघटनेचे अध्यक्ष नामदेव बोराडे, भाऊसाहेब आडके, शंकर रोकडे, शरद पगार, सुरेश दळवी, नंदू बरकले, शिवाजी गायधनी, मधुकर मुठाळ, दिनकर गायधनी, नामदेव सहाणे, विष्णुपंत आडके, विजय शिंदे मोठ्या संख्येने उपस्थित होते.