नाशिक जिल्ह्यात टँकरचा आकडा पावसाळ्यात दीडशेवर

नाशिक : जुलै महिन्याच्या अखेरच्या आठवड्यात दमदार पावसाचे आगमन झाले. तर काही भागांना पावसाने अक्षरशः झोडपून काढले आहे. तरी जिल्हाभर म्हणावा तसा समाधानकारक पाऊस न झाल्याने अजूनही पाणीटंचाई जाणवत आहे. परिणामी अजूनही जिल्ह्याची मदार टॅंकरवरच आहे. 

मागील महिन्यात २५ जूनअखेर सर्वाधिक १२७८ गावे, वाड्यांसाठी ३९७ टँकर सुरू होते. मात्र त्यात घट होऊन जुलै महिनाअखेर ४५७ गावे-वाड्यांची तहान टँकरवरच अवलंबून आहे. त्यामुळे जिल्हाभर १५५ टँकर सुरू आहेत. यासाठी अजूनही १५९ विहिरी अधिग्रहित आहेत. टँकरच्या ३७६ फेऱ्या सुरू आहेत. येवला तालुक्यात सर्वाधिक ४१ टँकर अजूनही सुरू आहेत. मात्र मागील महिन्याच्या तुलनेत ही गावे व टँकरची आकडेवारी ५० टक्के कमी झाली आहे. 

पावसाचे उशिरा आगमन झाल्याने अडचणी वाढल्या होत्या. मात्र नाशिक, त्र्यंबकेश्‍वर, इगतपुरी, दिंडोरी, पेठ, कळवण आणि सुरगाणा तालुक्यांना या पावसाने झोडपून काढले आहे. येवला, नांदगाव, मालेगाव, बागलाण, सिन्नर, चांदवड, मालेगाव आदी तालुक्यांमध्ये पावसाने समाधानकारक हजेरी लावली नाही. परिणामी, तालुक्यांमध्ये टँकरने पाणीपुरवठा करावा लागत आहे.