नगर जिल्हा बॅंक देणार तीन लाखांपर्यंत बिनव्याजी पीककर्ज

नगर : जिल्ह्यातील शेतकऱ्यांना आता तीन लाखांपर्यंत बिनव्याजी कर्ज मिळणार आहे. जिल्हा मध्यवर्ती सहकारी बॅंकेच्या संचालक मंडळाने बैठकीत हा निर्णय घेतला आहे. यापूर्वी तीन लाखांपर्यंत पीककर्ज घेतल्यास दोन टक्के व्याज भरावे लागत होते. केंद्र सरकार व राज्य सरकारच्या व्याज परताव्यामुळे हे व्याज लागत होते. दोन टक्के भरावयाचे व्याज जिल्हा बॅंक स्वनिधीतून भरणार आहे, असा निर्णय संचालक मंडळाने घेतला आहे.

जिल्हा मध्यवर्ती सहकारी बॅंकेच्या संचालक मंडळाची दोन दिवसांपूर्वी अध्यक्ष सीताराम गायकर यांच्या उपस्थितीत बैठक झाली. उपाध्यक्ष रामदास वाघ, ज्येष्ठ संचालक शिवाजी कर्डिले, मुख्य कार्यकारी अधिकारी रावसाहेब वर्पे आदी उपस्थित होते.

नगर जिल्हा मध्यवर्ती सहकारी बॅंकेने मागील महिन्यात झालेल्या बैठकीत शेतकऱ्यांना वैयक्तिक हमीपत्रावर पीककर्ज देण्याचा आगळावेगळा निर्णय घेतला होता. शिवाय पीककर्जाच्या क्षमतेतही वाढ केली आहे. यंदा शेतकऱ्यांकडून पीककर्जाची बॅंकेकडे वारंवार मागणी होत आहे. मात्र, काही तांत्रिक अडचणींमुळे बॅंक शेतकऱ्यांना कर्जपुरवठा करू शकत नव्हती.

यंदा हवामान खात्याने दमदार पावसाचे भाकीत केले आहे. त्यामुळे कर्जपुरवठा करण्याचा निर्णय जिल्हा बॅंकेने घेतला आहे. संयुक्त उतारा असलेले शेतकरी सभासद, पीककर्ज सोडून मध्यम व दीर्घ मुदतीचे इतर बॅंकांकडून कर्ज घेणारे कर्जदार शेतकरी सभासद, कर्जमुक्ती योजनेत पात्र असलेल्या मात्र शासनाकडून कर्जमाफीची रक्कम प्राप्त न झालेल्या शेतकरी सभासदांसाठी पीककर्ज पुरवठा करण्याचा निर्णय यापूर्वीच जिल्हा बॅंकेने घेतलेला आहे.

शेतकऱ्यांकडून पीककर्जाची बॅंकेकडे वारंवार मागणी होत आहे. मात्र, काही तांत्रिक अडचणींमुळे बॅंक शेतकऱ्यांना कर्जपुरवठा करू शकत नव्हती. यंदा कोरोना संकटामुळे शेतकरी अडचणीत आला आहे. त्यामुळे कर्जपुरवठा करण्याचा निर्णय जिल्हा बॅंकेने घेतला आहे. - सीताराम गायकर, अध्यक्ष, जिल्हा मध्यवर्ती सहकारी बॅंक, नगर