मतदार यादीत वाढला महिलांचा टक्का

नगर : निर्दोष मतदार यादी तयार करण्यासाठी जिल्हा प्रशासनाने महाविद्यालयापासून गावापर्यंत फेरी, मेळावे घेत जनजागृती अभियान राबविले. त्यामुळे मागील लोकसभा निवडणुकीच्या तुलनेत या वर्षी जिल्ह्याच्या मतदार यादीत महिलांचा टक्का तब्बल दीड लाखाने वाढला आहे. विशेष म्हणजे यंदा वाढलेल्या मतदात्यांमध्ये पुरुषांपेक्षा महिला अधिक आहेत. त्यामुळे साहजिकच लोकप्रतिनिधी निवडताना महिलांची भूमिका निर्णायक ठरणार आहे.

निवडणूक शाखेतर्फे लोकसभा निवडणुकीची तयारी पूर्ण होत आली आहे. मागील अनेक निवडणुकांचा अनुभव पाहता, मतदार यादीमध्ये पुरुष मतदारांच्या तुलनेत महिला मतदारांचे प्रमाण कमी असायचे. हा टक्का वाढवण्यात जिल्हा प्रशासनास यंदा यश आले. २०१४मध्ये झालेल्या निवडणुकीच्या वेळी नगर व शिर्डी लोकसभा मतदारसंघात ३१ लाख ५४ हजार ३८७ मतदार होते. त्यांत १६ लाख ६१ हजार ९७१ पुरुष व १४ लाख ९२ हजार ३५४ महिला होत्या. यंदा होणाऱ्या लोकसभा निवडणुकीसाठी ३४ लाख २९ हजार ८८ मतदार मतदान करणार आहेत. या वर्षी मतदार दोन लाख ७४ हजार ७०१ने वाढले आहेत. या वाढलेल्या मतदारांमध्ये १७ लाख ८९ हजार ४५१ पुरुष, तर १६ लाख ३९ हजार ५०२ महिला मतदार आहेत.

मतदानाची टक्केवारी वाढणार? नवमतदार व त्यात महिला मतदार वाढविण्यात निवडणूक शाखेला यश आल्याचे यंदाच्या आकडेवारीवरून दिसते. पुरुषांपेक्षा महिला मतदार मतदानाबाबत गंभीर असल्याचेही गेल्या काही वर्षांच्या आकडेवारीवरून दिसते. यंदा महिला मतदार वाढल्याने मतदानाची टक्केवारीही वाढणार असल्याचा तज्ज्ञांचा अंदाज आहे. मतदानाची टक्केवारी वाढली तर त्याचा फायदा नेमका कोणाला होईल, हे पाहणेही औत्सुक्‍याचे ठरणार आहे.