परभणी ः वसंतराव नाईक मराठवाडा कृषी विद्यापीठाने विकसित केलेले संकरित कपाशीचे ‘नांदेड ४४’ हे वाण अनेक वर्षांच्या संशोधन चाचण्या घेऊन बीटीमध्ये परावर्तीत करण्यात आले आहे. खासगी वाणांच्या तुलनेत हे वाण अनेक बाबतीत सरस ठरणार आहे. त्यामुळे एके काळी शेतकऱ्यांमध्ये लोकप्रिय असलेले वाण परत एकदा शेतकऱ्यांच्या पसंतीस उतरेल. सार्वजनिक क्षेत्रातील बीटी कपाशीच्या वाणांच्या बियाण्याचा बाजारपेठेतील वाटा येत्या काही वर्षात वाढतील, असा विश्वास कुलगुरू डॉ. अशोक ढवण यांनी व्यक्त केला.
सोमवारी (ता. २२) महाराष्‍ट्र राज्‍य बियाणे महामंडळ (महाबीज) आणि वसंतराव नाईक मराठवाडा कृषी विद्यापीठ यांच्या संयुक्त विद्यमाने विकसित करण्यात आलेल्या संकरित कपाशीच्या नांदेड-४४ बीटी (बीजी २) आणि पीकेव्ही हायब्रीड-२ बीटी (बीजी २) या वाणांचा पीक प्रात्‍यक्षिक पाहणी कार्यक्रम परभणी येथील वसंतराव नाईक मराठवाडा कृषी विद्यापीठातील बलसा मध्‍यवर्ती प्रक्षेत्रावर आयोजित करण्यात आला होता.
या वेळी अध्‍यक्षस्‍थानी डॉ. अशोक ढवण होते. महाबीजचे व्‍यवस्‍‍थापकीय संचालक ओमप्रकाश देशमुख, संचालक वल्‍लभराव देशमुख, वनामकृविचे संशोधन संचालक डॉ. दत्तप्रसाद वासकर, विस्तार शिक्षण संचालक डॉ. प्रदीप इंगोले, महाबीजचे महाव्यवस्थापक (उत्‍पादन) सुरेश पुंडकर, महाव्यवस्थापक (विपणन) रामचंद्र नाके, महाव्यवस्थापक (गुण नियंत्रण व संशोधन) डॉ. प्रफुल्‍ल लहाने, जिल्‍हा अधीक्षक कृषी अधिकारी बी. आर. शिंदे, कापूस विशेषज्ञ डॉ. खिजर बेग, महाबीज विभागीय व्‍यवस्‍थापक सुरेश गायकवाड, मध्‍यवर्ती प्रक्षेत्राचे प्रभारी अधिकारी डॉ. विलास खर्गखराटे, जिल्‍हा व्‍यवस्‍थापक गणेश चिरुटकर आदी उपस्थित होते.
डॉ. ढवण पुढे म्हणाले, सार्वजनिक क्षेत्रातील बीटी कपाशी ही ऐतिहासिक उपलब्धी आहे. खासगी आणि सार्वजनिक क्षेत्रातील बीटी कपाशीची प्रक्षेत्रावर लागवड करून तुलनात्मक नोंदणी घ्याव्यात.
ओमप्रकाश देशमुख म्हणाले, पुढच्या वर्षी नांदेड ४४ बीटी आणि पीकेव्ही हायब्रीड २ बीटी या कपाशीच्या वाणांच्या बियाण्यांची ५० ते ५५ हजार पाकिटे शेतकऱ्यांना उपलब्ध होतील.
श्री. नाके म्हणाले, फक्त महाबीजकडूनच या वाणांचे बियाणे शेतकऱ्यांना उपलब्ध करुन दिले जाईल.
डॉ. वासकर म्हणाले, बीटी मध्ये परावर्तीत झाल्यामुळे नांदेड ४४ वाणांचा परत एकदा देशामध्ये दबदबा निर्माण होणार आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.