नांदेड जिल्ह्यात मुसळधार पावसाने जमिनी खरडल्या

नांदेड ः नांदेड, परभणी, हिंगोली जिल्ह्यांतील बहुतांश मंडळांमध्ये बुधवारी (ता. ६) मध्यरात्रीपासून गुरुवार (ता. ७) सकाळी आठपर्यंत माॅन्सूनपूर्व पावसाने जोरदार हजेरी लावली. नांदेड जिल्ह्यातील हिमायतनगर, माहूर, हदगाव आदी तालुक्यांतील ९ मंडळांमध्ये अतिवृष्टी झाली.

मराठवाडा-विदर्भाच्या सीमेवरून वाहणाऱ्या पैनगंगा नदीला पूर आला. मुसळधार पावसामुळे जमिनी खरडून गेल्या. लागवड केलेले हळद बेणे तसेच सोयाबीन बियाणे वाहून गेल्यामुळे शेतकऱ्यांचे नुकसान झाले. नांदेड जिल्ह्यातील हिमायतनगर (११४ मिमी), सरसम (९५ मिमी), जवळगाव (७० मिमी), वाई बाजार (११३ मिमी), सिंदखेड (७२ मिमी), तामसा (१३३ मिमी), आष्टी (९३ मिमी), बारुळ (६५ मिमी), किनी (७८ मिमी) सात मंडलामध्ये अतिवृष्टी झाली.

हिमायनगर, हदगाव, माहूर तालुक्यांतील अनेक मंडळांमध्ये बुधवारी मध्यरात्रीनंतर मुसळधार पाऊस झाला. नांदेड, अर्धापूर, मुदखेड, भोकर, उमरी, कंधार, लोहा, किनवट, मुखेड, नायगाव तालुक्यात जोरदार पाऊस झाला. धर्माबाद, बिलोली, देगलूर तालुक्यांत पावसाचा जोर कमी होता. गुरुवारी सकाळी सहा वाजेपर्यंत अनेक भागांत पाऊस सुरूच होता. मुसळधार पावसामुळे अनेक मंडळांतील शेतकऱ्यांच्या पेरणीसाठी तयार केलेल्या जमिनी खरडून गेल्या. नुकतेच लागवड केलेले हळदीचे बेणे तसेच सोयाबीनचे बियाणे वाहून गेले. हिमायनगर येथे ३७ मेंढ्या दगावल्या. गंगाखेड, पालम, पूर्णा, परभणी, सेलू तालुक्यांत पावसाचा जोर अधिक होता. हिंगोली जिल्ह्यातील हिंगोली, कळमनुरी, वसमत, औंढा नागनाथ, सेनगाव तालुक्यांत मध्यम ते जोरदार पाऊस झाला.

मंडळनिहाय पाऊस (मिमी) नांदेड जिल्हा ः नांदेड शहर २४, नांदेड ग्रामीण २०, वसरणी ३३, तरोडा २३, तुप्पा ३५, लिंबगाव ३३, विष्णुपुरी ३०, हिमायनगर ११४, सरसम ९५, जवळगाव ७०, किनवट ३०, इस्लामपूर १८, मांडवी २७, बोधडी ४८, दहेली ४७, जलधारा २३, शिवणी ३६, उमरी ३३, सिंधी ३६, येवती २४, बाऱ्हाळी २१, चांडोला २५, मुखेड ३९, जांब ३२, नायगाव ३०, मांजरम ५२, बरबडा ३२, माहूर ४५, वाई ११३, वानोळा ४०, सिंदखेड ७७, मुदखेड ५३, मुगट ४५, बारड ४१, हदगाव ६१, तामसा १३३, पिंपरखेड ५४, आष्टी ९३, तळणी ३६, मनाठा ४०, निवघा ५८, कंलबर ३२, कापशी ४०. परभणी जिल्हा ःदैठणा १५, चाटोरी ४३, बनवस २७, पूर्णा १९, चुडावा १९, राणीसावरगांव १५, माखणी १५, मानवत १८. हिंगोली जिल्हा ः माळहिवरा ३०, बासंबा १८, कळमनुरी १५, नांदापूर २५, आखाडा बाळापूर १८, हट्टा १६, गिरवगांव १९, आंबा १५.