नांदेड जिल्ह्यात ८० टक्के क्षेत्रावर पेरणी

नांदेड ः नांदेड जिल्ह्यात खरीप हंगामात ६ लाख ८९५ हेक्टरवर (८०.८९ टक्के) पेरणी झाली आहे. प्रमुख पिकांच्या पेरणी क्षेत्रामध्ये सोयाबीनची पेरणी २ लाख ९४ हजार २६५ हेक्टरवर (९५.१२ टक्के) तर कपाशीची लागवड १ लाख ९२ हजार ६३६ हेक्टर (७३.९५ टक्के) झाली आहे, अशी माहिती जिल्हा अधीक्षक कृषी अधिकारी रविशंकर चलवदे यांनी दिली.

जिल्ह्यातील खरिपाचे सर्वसाधारण क्षेत्र ७ लाख ४२ हजार ८६१ हेक्टर आहे. शुक्रवार (ता. ३) पर्यंत भाताची १६९ हेक्टर (१९.७० टक्के), ज्वारीची २१ हजार ३१२ हेक्टर (४०.०२ टक्के), बाजरीची १० हेक्टर (३०.३० टक्के), मक्याची ४७१ हेक्टर (७२.५७ टक्के), तुरीची ५३ हजार ४६९ हेक्टर (८७.९६ टक्के), मुगाची १८ हजार ७२३ हेक्टर (६९.६२ टक्के), उडदाची १९ हजार १७९ हेक्टर (६७.६२ टक्के), तिळाची ३३१ हेक्टर (४१.४३ टक्के), कारळ्याची २१९ हेक्टर (४६.५० टक्के) पेरणी झाली आहे.

जिल्ह्यात तृणधान्याची एकूण २१ हजार ९९९ हेक्टरवर (३९.९७ टक्के), कडधान्याची ९१ हजार ३७१ हेक्टर (७८.४७ टक्के), गळित धान्याची २ लाख ९४ हजार ८८९ हेक्टरवर (९४.८६ टक्के) पेरणी झाली आहे. जिल्ह्यातील सोळा तालुक्यांत खरिपाच्या सर्वसाधारण क्षेत्राच्या ५१.५९ ते १०३.६० टक्के क्षेत्रावर पेरणी झाली आहे.