नाणार तेल शुद्धीकरण प्रकल्पावरुन शिवसेनेला लक्ष्य 

मुंबई : नाणार (ता. राजापूर) येथील प्रस्तावित हरित तेलशुध्दीकरण प्रकल्पाला विरोध करणाऱ्या शेतकऱ्यांचे प्रतिनिधीत्व करणारे अशोक वालम यांना शिवसेना पक्षप्रमुख उध्दव ठाकरे यांनी ’मातोश्री‘वर बोलावून धमकी दिल्याचा आरोप माजी मुख्यमंत्री आणि स्वाभिमान पक्षाचे नेते नारायण राणे यांनी पत्रकार परिषदेत केला. 

या वेळी उपस्थित असलेले वालम यांचे चिरंजीव विनय यांनी मातोश्रीवरच्या बैठकीचा घटनाक्रम कथन करून राणेंच्या आरोपाला दुजोरा दिला. तेलशुद्धीकरण प्रकल्पासाठी राज्य सरकारकडून शेतकऱ्यांवर दडपशाही सुरू आहे. पोलिस आणि महसूल खात्याचे अधिकारी शेतकऱ्यांना धमकावून जमिनीचे संपादन करीत आहेत. कोकणच्या मुळावर उठणाऱ्या तेलशुद्धीकरण प्रकल्पाला आपला विरोध आहे. 

महाराष्ट्र नवनिर्माण सेनेचे अध्यक्ष राज ठाकरे यांनी गेल्या आठवड्यात रत्नागिरी दौऱ्यात नाणार प्रकल्पाला विरोध केला होता. आता नारायण राणे यांनीही प्रकल्पाच्या विरोधात भूमिका घेतल्याने प्रकल्पाचे भवितव्य अधांतरी सापडण्याची चिन्हे आहेत. नाणार परिसरातील १६ गावांतील शेतकऱ्यांची प्रकल्पाला असहमती आहे. प्रकल्पाला विरोध वाढू लागल्यानंतर उद्धव ठाकरे यांनी वालम यांना मातोश्रीवर बोलावून घेऊन प्रकल्पाविरोधात आरडाओरड करू नका, शिवसेना नेत्यांच्या विरोधात बोलू नका, अशी धमकी दिल्याचे राणे म्हणाले. 

‘शिवसेनेची दुटप्पी भूमिका’  तेलशुद्धीकरण प्रकल्प हा आंध्र प्रदेशला जाणार होता. मात्र, शिवसेनेचे केंद्रीय मंत्री अनंत गिते आणि स्थानिक खासदार विनायक राऊत यांनी हा प्रकल्प कोकणात आणण्याचा घाट घातला. त्यामुळे शिवसेनेचा प्रकल्पाला होणारा विरोध म्हणजे चोराच्या उलट्या बोंबा आहेत. गुजरातमधील भूमाफियांसाठी प्रकल्प आखला जात असल्याचा राऊत यांचा आरोप हास्यास्पद आहे. स्वतः राऊत, आमदार राजन साळवी यांनी जमिनी घेऊन ठेवल्या आहेत. कमी भावात जमीन घेऊन त्या सरकारला मोठ्या किंमतीत दिल्या जाणार आहेत. प्रकल्पाला विरोध असेल तर तो लादला जाणार नाही असे उद्योगमंत्री सुभाष देसाई म्हणतात. मग उद्योगमंत्र्यांनी प्रस्तावावर सही कशी केली? भूसंपादनासाठी महसूल खात्याकडून नोटीसा का बजावल्या जात आहेत? असे सवाल राणे यांनी केले.