नाशिक जिल्ह्यातील काही भागात पुन्हा मुसळधार पाऊस

नाशिक : जिल्ह्यात गेल्या पंधरा दिवसांपेक्षा अधिक काळ पावसाने ओढ दिली होती. पावसाच्या प्रतीक्षेत शेतकरी असताना बुधवारी (ता. ४) चांदवड, दिंडोरी, कळवण, निफाड व नाशिक तालुक्यात पावसाने दमदार हजेरी लावली. त्यामुळे शेतकऱ्यांमध्ये समाधानाचे वातावरण आहे. 

पावसाची वाट पाहत असताना दुपारनंतर दमदार पावसाला सुरवात झाली. चांदवड तालुक्यात वडणेर भैरव, धोंडगव्हान परिसरात मुसळधार पाऊस झाला. काही क्षणात पावसाचा वेग वाढल्याने ओढे-नाले एक झाले. काही काळ धोंडगव्हाण व पाचोरे वणी या गावांचा संपर्क तुटला होता. त्यामुळे या परिसरातील टोमॅटो पिकाचे मोठे नुकसान झाले आहे. या पावसामुळे द्राक्ष उत्पादकांची चिंता वाढली असून त्यांनी धास्ती घेतली आहे. त्यात काही शेतकऱ्यांनी छाटण्यांची सुरवात केली असून हंगाम सुरू होण्याच्या ऐन तोंडावर पावसाचा तडाखा बसला आहे. 

दिंडोरी तालुक्यात तिसगाव, खेडगाव, शिंदवड, जानोरी, मोहाडी, खतवड, दहेगाव व लखमापूर भागातही पावसाने जोरदार हजेरी लावली. यामध्ये तिसगाव व शिंदवड परिसरात तीन तासांत ८५ मिमी पावसाची नोंद झाली. या पावसामुळे टोमॅटो, कांदा व भाजीपाला पिकाचे नुकसान होण्याची शक्यता आहे. निफाड तालुक्यातील पिंपळगाव बसवंत, लासलगाव, आहेरगाव, उगकाव, नैताळे, शिवरे, पिंपळस, कोठुरे, जळगाव, सुकेने, पावसाने एक ते दीड तास जोरदार कोसळला. त्यामुळे या भागातसुद्धा द्राक्ष व टोमॅटो पिकांचे मोठे नुकसान झाले आहे. 

जिल्ह्यात पावसामुळे अनेक ठिकाणी मोठे नुकसान झाले आहे. आवक ठिकाणी टोमॅटो, द्राक्ष व काही ठिकाणी भाजीपाला पिके गुडघाभर पाण्यात पिके गेली होती. त्यामुळे आगामी उत्पादनावर परिणाम तर होणारच आहे. मात्र, शेतकऱ्यांनी केलेला खर्च काही ठिकाणी वाया जाण्याची शक्यता आहे.