नाशिक जिल्ह्यात खरिपासह भाजीपाला पिके धोक्यात

नाशिक : जिल्ह्याच्या सर्वदूर भागात शनिवारी (ता.१९) नंतर पावसाने जोर धरला आहे. त्यामुळे जिल्ह्यातील अनेक भागात खरीप हंगामातील मका, बाजरी, सोयाबीन, टोमॅटो, कांद्यासह भाजीपाला पिकांचे मोठे नुकसान झाले आहे. शेतांमध्ये पाणी साचून राहिल्याने पिके खराब झाली आहेत.     

शनिवारपासून पावसाने जोर धरल्यानंतर रविवारी (ता.२०) काही प्रमाणात ओढ दिली. झालेल्या अतिवृष्टीमुळे सर्वच भागात शेतांमध्ये पाणी साचून आहे. त्यामुळे काही ठिकाणी सोयाबीन पीक पाण्याखाली गेले आहे. बाजरी पिके आडवी झाल्याने कापणीच्या अडचणी वाढणार आहेत. तर, मका पिकांच्या कणसामध्ये दाणे भरण्याच्या अवस्थेत नुकसान हेत आहे. पिके चाऱ्यासह कुजण्याची शक्यता आहे. 

नाशिक, सिन्नर, मालेगाव, सटाणा, दिंडोरी, चांदवड या तालुक्यातील अनेक भागात नवीन भाजीपाला पिके टोमॅटो, शिमला मिरचीवर बुरशी, डाऊनी, करपा, फळ सडण्याचे प्रमाण वाढले आहे. सिन्नर तालुक्यात विदेशी भाजीपाला लागवडी खराब झाल्या आहेत. भाजीपाला पिकांचे मोठे नुकसान झाले आहे. मालेगाव तालुक्यातील काटवन परिसरात टोमॅटो लागवडी जमीनदोस्त झाल्या आहेत. तर, शेवग्याच्या लागवडी खराब होत आहेत. शेतकऱ्यांसमोर मोठे संकट उभे राहिले आहे.     

जिल्ह्यात खरीप हंगामातील पोळ कांदा लागवड मोठ्या प्रमाणावर झाल्या आहेत. 

कांदा लागवडी पाण्याखाली 

शेतकऱ्यांनी मोठ्या अडचणींचा सामना करत खरीप कांदा बियाण्याची उपलब्धता केली. रोपवाटिका तयार झाल्यानंतर रोपांचे नुकसान झाले. उत्पादन खर्च वाढता असताना होणारे नुकसान शेतकऱ्यांसाठी डोकेदुखी ठरत आहे. चांदवड, येवला, देवळा तालुक्यातील अनेक कांदा लागवडी पाण्याखाली आहेत. कळवण येथे झालेल्या अतिवृष्टीमुळे येथील शेतकरी अमोल मुर्तडक यांची विहिर कोसळली.