शाश्वत पाणी व्यवस्थापनावर आजपासून पुण्यात राष्ट्रीय परिषद

पुणे  ः जलशक्ती मंत्रालयाच्या राष्ट्रीय जल विज्ञान प्रकल्पाअंतर्गत शाश्वत पाणी व्यवस्थापन या विषयावर आजपासून (बुधवार) दुसऱ्या राष्ट्रीय परिषदेचे आयोजन करण्यात आले आहे. ही परिषद शुक्रवारपर्यंत (ता. ८) पुण्यातील नगर रोडवरील हॉटेल हयात रिजेंसी येथे होईल. 

या परिषदेचे उद्घाटन आज सकाळी १० वाजता जलशक्ती मंत्रालयाचे केंद्रीय मंत्री गजेंद्रसिंग शेखावत यांच्या हस्ते होणार आहे. राष्ट्रीय जलविज्ञान प्रकल्पाचे वरिष्ठ सहआयुक्त राकेश कश्यप, दिपक कुमार, जलसंपदा विभागाचे राजेंद्र पवार, महाराष्ट्र अभियांत्रिकी संशोधन संस्थेचे महासंचालक एन. व्ही. शिंदे, जलसंपदा विभागाचे मुख्य अभियंता व्हि.जी. रजपूत, राजेंद्र मोहिते, जल विज्ञान प्रकल्पाचे मुख्य अभियंता श. द. भगत, जागतिक बॅंक तसेच सिंचन व निचराविषयक कमिशनचे तज्ज्ञ, तसेच विविध देशांतील तज्ज्ञ या परिषदेत सहभागी होणार आहे.  

परिषदेचा समारोप गुरुवारी (ता. ७) होणार असून, या वेळी जलशक्ती मंत्रालयाचे राज्यमंत्री रतनलाल कटारिया उपस्थित राहणार आहे. परिषदेत १२ तांत्रिक सत्र आयोजित करण्यात आले असून, यामध्ये तज्ज्ञ अनुभवकथन करणार आहेत. या व्यतिरिक्त जलसंधारणाच्या उत्कृष्ट पद्धतीवर आधारित एक सत्र आयोजित करण्यात आले आहे. जलस्रोत संवर्धन क्षेत्रात उत्कृष्ट कामगिरी केलेल्या विविध सरकारी संस्था आणि स्वयंसेवी संस्था यात अनुभव कथन करणार आहेत. याशिवाय प्रतिष्ठित संस्थांच्या संशोधकांसाठी एक पोस्टर स्पर्धा आयोजित करण्यात आली आहे.