पुणे: फळे, फुले, भाजीपाला निर्यातीला चालना देण्यासाठी पुण्यात १७ जानेवारीला राष्ट्रीय परिषदेचे आयोजन करण्यात आलेले आहे. यात शेतकरी, शेतकरी गट शेतकरी उत्पादक कंपन्यादेखील सहभागी होऊ शकतील, अशी माहिती एमसीसीआयएचे महासंचालक प्रशांत गिरबाने व कृषी व्यवसाय समितीचे चेअरमन उमेशचंद्र सरंगी यांनी दिली. सेनापती बापट रोडवरील महाराष्ट्र चेंबर ऑफ कॉमर्स इंडस्ट्रिज अॅन्ड अॅग्रिकल्चरच्या (एमसीसीआयए) पाचव्या मजल्यावर बजाज गॅलरीत सकाळी साडेनऊ ते सायंकाळी सहा दरम्यान ही परिषद होईल. कृषी व फलोत्पादन निर्यातीमधील आधुनिक कल, नवा पुढाकार व संधी याची माहिती या वेळी शेतकऱ्यांना मिळणार आहे. शेतकरी, प्रयोगशील शेतकरी, निर्यातदार शेतकरी, कृषी निर्यातदार, उद्योजक, निर्यातदार कंपन्या, तज्ज्ञ्, अभ्यासक तसेच शासकीय अधिकारी सहभागी होत आहेत. कृषी निर्यातीमधील संधी व आव्हाने, कापणीतील काळजी, साठवण, पायाभूत सुविधा, निर्यातक्षम रोपे, प्रमाणिकरण, वाहतूक, मानकांच्या कार्यपध्दती, निर्यातीचे नियम, कीटकनाशकांचे निकष, रेसिड्यू समस्या, नवे पॅकिंग तंत्र, जीआयएस मानांकन, कीडमुक्त क्षेत्राचे प्रमाणपत्र तसेच इतर महत्त्वाच्या विषयावर परिषदेत चर्चा होईल. श्री. गिरबाने म्हणाले, “जागतिक व्यापार विषयावर स्वतंत्र प्रशिक्षण वर्ग, कोल्डचेन याविषयावर परिसंवाद अलीकडेच घेतला गेला. आता मात्र केवळ राज्याची कृषी व निर्यात क्षेत्र डोळ्यासमोर ठेवून ही परिषद होते आहे. यात आम्ही काही शेतकऱ्यांना त्यांचे अनुभव सांगण्याची संधी देखील देत आहोत.” राष्ट्रीय कृषी निर्यात परिषद राज्याच्या कृषी निर्यातीला चालना देणारी ठरणार असल्याचे श्री. सरंगी यांनी स्पष्ट केले. “राज्यातील फळे, भाजीपाला निर्यातदार शेतकरी व शेतकरी उत्पादक कंपन्या, पॅकहाउसचालक, निर्यातदार, प्रयोगशाळा, प्रमाणिकरण संस्था याशिवाय शास्त्रज्ञ, बॅंका आणि निर्यातसंबंधी सरकारी अधिकारी या परिषदेच्या निमित्ताने एकाच व्यासपीठावर उपलब्ध होतील,” असेही ते म्हणाले. परिषदेसाठी सशुल्क नाव नोंदणीकरिता शेतकरी, निर्यातदार, उद्योजक, व्यवसायिक व विद्यार्थ्यांनी kiranj@mcciapune.com तसेच ०२०२५७०९००० किंवा ०९१७२१०८६०४ या क्रमांकावर संपर्क साधावा, असे आवाहन करण्यात आले आहे. कृषी निर्यातीवर प्रदर्शनाचे आयोजन कृषी विभाग, राष्ट्रीय फलोत्पादन अभियान, अपेडा, वाणिज्य मंत्रालय, महाराष्ट्र कृषी उद्योग विकास महांडळ आणि नाबार्ड यांना भागीदार म्हणून परिषदेत निमंत्रित करण्यात आले आहे. कृषी निर्यातीची माहिती देणारे अभ्यासपूर्ण प्रदर्शनाचेही आयोजन करण्यात आले आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.