‘राष्ट्रवादी’चे खास लक्ष नगर दक्षिण लोकसभेकडे

नगर : गेल्या अनेक दिवसांपासून जिल्ह्यासह राज्याचे लक्ष असलेल्या नगर दक्षिण लोकसभा मतदार संघावर राष्ट्रवादीने लक्ष केंद्रीत केले आहे. लोकसभा निवडणुकीच्या पार्श्वभूमीवर दक्षिण नगर जिल्ह्यातील चार विधानसभा मतदार संघांत राष्ट्रवादी कॉंग्रेसतर्फे गुरुवार (ता. ३१) व शुक्रवार (ता. १) या दिवशी निर्धार परिवर्तनाचा मेळाव्याचे आयोजन करण्यात आलेले आहे. यानिमित्त राष्ट्रवादी कॉंग्रेसचे प्रमुख नेते नगर जिल्ह्यामध्ये दोन दिवस असणार आहेत. 

निर्धार परिवर्तन मेळाव्याबाबत पक्षाचे जिल्हाध्यक्ष राजेंद्र फाळके यांनी मंगळवारी (ता. २९) माहिती दिली. युवती कॉंग्रेसच्या जिल्हाध्यक्ष संध्या सोनवणे, सोमनाथ धूत आदी उपस्थित होते. 

फाळके म्हणाले, ‘‘रायगडावरून सुरू झालेली राष्ट्रवादी कॉंग्रेसची निर्धार परिवर्तनाचा यात्रा करमाळ्यावरून (जि. सोलापूर) गुरुवारी नगर जिल्ह्यात दाखल होईल. या यात्रेनिमित्त कर्जत, पारनेर, पाथर्डी व नगर तालुक्‍यातील बायजाबाई जेऊर येथील सभा होणार आहेत. या सभांत माजी उपमुख्यमंत्री अजित पवार, माजी उपमुख्यमंत्री छगन भुजबळ, विधान परिषदेचे विरोधी पक्ष नेते धनंजय मुंडे, राष्ट्रवादी कॉंग्रेसचे प्रदेशाध्यक्ष जयंत पाटील, ज्येष्ठ नेते आमदार दिलीप वळसे पाटील, ज्येष्ठ नेते मधुकर पिचड, महिला आघाडीच्या प्रदेशाध्यक्ष चित्रा वाघ, युवक राष्ट्रवादी कॉंग्रेसचे प्रदेशाध्यक्ष संग्राम कोते पाटील आदी उपस्थितांना संबोधित करणार आहेत. श्रीगोंदे येथील नुकतीच निवडणूक झाल्यामुळे तेथे सभा घेण्यात आलेली नाही. 

लोकसभा निवडणुकीसाठी राष्ट्रवादी कॉंग्रेसकडे इच्छुक उमेदवार खूप आहेत. उमेदवार कोण हा ठरविण्याचा अधिकार पक्षश्रेष्ठींचा आहे. शरद पवार यांची आज्ञा हीच माझी इच्छा असल्याने त्यांचा आदेश असल्यास मी निवडणूक लढेल. पारनेर येथील सभेत शिवसेनेचे कार्यकर्ते निलेश लंके हे त्यांच्या समर्थकांसह राष्ट्रवादी कॉंग्रेसमध्ये प्रवेश करणार आहेत. लंके यांच्या पक्षप्रवेशामुळे पारनेर तालुक्‍यात बेरजेचे राजकारण होईल. पक्षापेक्षा आपण श्रेष्ठ आहोत असे कुणी समजण्याचे कारण नाही. कुणीही याबाबत जर तर वर चर्चा करू नये, असे फाळके यांनी स्पष्ट केले.

नगर दक्षिणचा इतिहास  आघाडीचे महाराष्ट्रातील जागावाटप अजून अंतिम झालेले नाही. काही जणांकडून जागा वाटपाबाबत संभ्रम निर्माण केला जात आहे. नगर दक्षिण लोकसभा मतदार संघाचा गेल्या काही निवडणुकीतील इतिहास सांगतो की कॉंग्रेस-राष्ट्रवादी कॉंग्रेसच्या उमेदवारांनी बंडखोरी केल्यास दोघांचे भांडण तिसऱ्याचा लाभ होतो. या भांडणात अपक्ष उमेदवार मात्र कधीही निवडून आलेला नाही, असे सूचक विधान फाळके यांनी केले.