नँचरल उद्योग समूह सुद्धा करणार सॅनिटायझरचे उत्पादन

शिराढोण, जि. उस्मानाबाद ः अन्न व औषध प्रशासन तसेच राज्य उत्पादन शुल्क विभागाने परवानगी दिल्याने प्रति दिन दहा हजार लिटर सॅनिटायझरचे उत्पादन लवकरच नॅचरल उद्योग समूह करणार असल्याची माहिती संस्थापक अध्यक्ष कृषिरत्न बी. बी. ठोंबरे यांनी दिली.

सध्या ‘कोरोना’च्या गंभीर परिस्थितीत हात स्वच्छ करण्यासाठी सॅनिटायझरची गरज आहे. सॅनिटायझरची बाजारात कमतरता जाणवत होती. बाजारातून ग्राहकांना मुबलक प्रमाणात व योग्य दरात सॅनिटायझर मिळावे. या उद्देशाने राज्य सरकारने सॅनिटायझरचे उत्पादन करण्याची परवानगी दिली आहे. 

औरंगाबाद विभागाचे अन्न व औषधी विभागाचे आयुक्त संजय काळे, राज्य उत्पादन शुल्कचे आयुक्त कांतीलाल उमाप, अधीक्षक केशव राऊत यांनी याबाबतचा परवाना दिला असून ‘आसवानी’ प्रकल्पाच्या माध्यमातून आधूनिक यंत्रणेच्या माध्यमातून व सॅनिटायझर उत्पादन करण्यासाठी लागणारा कच्चा माल उपलब्ध करुन लवकरच उत्पादन करण्यात येणार आहे. प्रारंभी अर्धा, एक, दोन, पाच लिटर तसेच दोनशे लिटरचे पॅकिंग बाजारात उपलब्ध होईल, अशी ही माहिती अध्यक्ष श्री. ठोंबरे यांनी दिली.

‘अँडलर्स बायो एनर्जी’ तयार करणार सॅनिटायझर ः सचिन वैद्य गौरगांव (ता. कळंब) येथील ‘अँडलर्स बायो एनर्जी’ प्रतिदिन दोन हजार लिटर सॅनिटायझरचे उत्पादन करणार असल्याची माहिती कार्यकारी संचालक सचिन वैद्य यांनी दिली. सॅनिटायझर उत्पादन करण्यासाठी लागणारा कच्चा माल उपलब्ध करुन लवकरच प्रतीदिन दोन हजार लिटर सॅनिटायझर उत्पादन करण्यात येणार आहे. प्रारंभी नव्वद मिली, दोनशे मिली, अर्धा लिटर तसेच एक लिटरचे पँकिंगमध्ये बाजारात उपलब्ध होईल. कारखान्याचे अध्यक्ष सदानंद बापट यांच्या मार्गदर्शनाखाली हा प्रकल्प सुर होणार असल्याची माहिती श्री. वैद्य यांनी दिली.