पाणी अमूल्य असल्याने जनजागृतेची गरज ः डॉ. मल्लिनाथ कलशेट्टी

कोल्हापूर : ‘‘पाण्यासाठी व्यापक जनजागृती होणे गरजेचे आहे. पाणी हे जीवन असून, ते अमूल्य आहे. त्यामुळे प्रत्येकाने पाणी काटकसरीने वापरावे’’, असे आवाहन आयुक्त डॉ. मल्लिनाथ कलशेट्टी यांनी केले. केशवराव भोसले नाट्यगृहात आयोजित केलेल्या जलजागृती सप्ताहाच्या समारोपाच्या कार्यक्रमात ते बोलत होते. 

महाराष्ट्र शासन जलसंपदा विभाग व कोल्हापूर महापालिकेच्या वतीने १६ ते २२ मार्च या कालावधीत जलजागृती सप्ताह झाला. सप्ताहाचा समारोप आयुक्त डॉ. कलशेट्टी यांच्या प्रमुख उपस्थितीत केशवराव भोसले नाट्यगृहात पार पडला. कार्यक्रमाचे उद्‌घाटन आयुक्त डॉ. कलशेट्टी व कोल्हापूर पाटबंधारे मंडळाचे अधीक्षक अभियंता आर. एम. संकपाळ यांच्या हस्ते जिल्ह्यातील नदीमधील संकलित केलेले कलशाचे जल पूजन व दीपप्रज्वलनाने आले. 

प्रास्ताविकात संकपाळ म्हणाले, ‘‘शासनाच्या निर्देशानुसार २०१६ वर्षापासून जलजागृती दिन साजरा केला जातो. यंदाचे हे चौथे वर्ष आहे. जलसंपदा विभागाच्या वतीने जिल्ह्यामध्ये ६० गावे व १२ तालुक्‍यांच्या ठिकाणी जलजागृती सप्ताह साजरा केला आहे. आज या कार्यक्रमाचा सांगता समारंभ आहे.’’ 

जलसंपदा विभागाने व कोल्हापूर महापालिकेने एकत्र मिळून कामे हाती घेतल्यास शहराचा विकास होईल, असे सांगितले. यानंतर सर्वांनी उभे राहून जलप्रतिज्ञा घेतली.  

आयुक्त डॉ. कलशेट्टी म्हणाले, ‘‘जल दिनाचे औचित्य साधून समाजात जल साक्षरता करण्याची गरज आहे. प्रत्येकाने पाण्याचा एकही थेंब वाया जाऊ न देता पाण्यासाठी काटकसरीने नियोजन करावे.’’

कारभारवाडीचे ठिबक सिंचन योजना पुरस्कर्ते प्रा. नेताजी पाटील म्हणाले, ‘‘कारभारवाडीत पाणी मुबलक असताना स्कीम बंद पडत आली होती. ग्रामस्थांच्या सांगण्यावरून १३१ शेतकऱ्यांना सोबत घेऊन ही स्कीम करणे सोपं नव्हतं. तरीही मार्च २०१५ मध्ये संपूर्ण गाव ठिबक सिंचन केले. सध्या उसाचे सरासरी उत्पादन हे ४३ टन आहे. यापूर्वी २७ टन सरासरी ऊस उत्पादन शेतकरी घेत होते. मात्र, सर्व शेती ठिबक सिंचनाखाली आणल्याने सरासरी उत्पादनात १६ टनांची वाढ होऊन ४३ टन उसाचे उत्पादन शेतकरी घेऊ लागलेत.’’ 

या वेळी पाटबंधारे विभागाचे कार्यकारी अभियंता रोहित बांदिवडेकर, अतिरिक्त आयुक्त श्रीधर पाटणकर, उपआयुक्त मंगेश शिंदे, डॉ. दिलीप पाटील, शंकर यादव, नगरसचिव दिवाकर कारंडे, डॉ. विजय पाटील, उदय गायकवाड उपस्थित होते.