काजू, आंबा फळपीक विमा प्रश्‍न तडीस नेण्याची गरज

रत्नागिरी ः फळपीक विमा योजनेअंतर्गत आंबा, काजू बागायतदारांना योग्य लाभ मिळाला नसल्याच्या तक्रारी रत्नागिरी जिल्ह्यात पुढे आल्या आहेत. एकाच मंडळातील बागायतदारांना वेगवेगळे निकष लावून लाभांश नाकारण्यात आल्याची तक्रार आंबा बागायतदार राजेंद्र कदम यांनी केली आहे. मात्र, त्यांना विमा कंपनीकडून सहकार्य मिळाले नाही. मुंबईत विमा कंपन्यांविरोधात शिवसेनेने दंड थोपटले होते. मात्र, रत्नागिरीतील आंबा बागायतदारांच्या प्रश्‍नासाठी स्थानिक शिवसैनिक प्रश्‍न तडीस नेणार का, असा प्रश्‍न उपस्थित केला जात आहे.

फळपीक विमा योजनेअंतर्गत १ जानेवारी ते ३१ मे २०१९ या कालावधीकरिता कोतवडे, खेडशी व पावस मंडळातील (ता. रत्नागिरी) फळबागांची विमा रक्कम २८ डिसेंबर २०१९ ला दि न्यू इंडिया अॅश्युरन्स कंपनीकडे वर्ग केली. कंपनीच्या कोकणातील प्रतिनिधींकडे चौकशी केल्यानंतर पीकविम्याविषयी पुणे येथून कार्यवाही होत असल्याचे सांगण्यात आले. पुणे येथे संपर्क होऊ शकला नाही. तसेच कंपनीच्या स्कायमेट हवामान केंद्राकडून मंडळनिहाय माहिती (डाटा) रत्नागिरीतील आंबा, काजू व्यावसायिकांना दिली गेली नाही. ३१ मे २०१९ नंतर विमा मुदत संपते. पुढील ४५ दिवसांत शासन निर्णयाप्रमाणे इन्शुरन्स क्लेम मंडळनिहाय माहितीनुसार शेतकऱ्याच्या खात्यात मंजूर रक्कम वर्ग करणे जरुरीचे आहे. चार महिने होऊनही दि न्यू इंडिया इन्शुरन्स कंपनी आणि स्कायमेट हवामान केंद्राकडून फळपीक विमा योजनेअंतर्गत मंजूर नुकसानभरपाई दिलेली नाही. याबाबत माहिती विचारण्यास गेल्यानंतर उडवाउडवीची उत्तरे दिली जात आहेत. 

पुढील वर्षाच्या फळपीक विमा भरण्याची वेळ आली असतानाही मागील वर्षाच्या फळपीक विम्याबाबत कोणतीही उचित कार्यवाही झालेली नाही. मंडळनिहाय कमाल, किमान तापमान व पाऊस झाल्याप्रमाणे बाधीत शेतकऱ्यांना नुकसानभरपाई मिळणे आवश्यक आहे. हवामान केंद्राकडील आकडेवारी जाहीर केल्यावर कंपनीकडून होत असलेला गोलमाल उघड होणार असल्याचे कदम यांनी स्पष्ट केले आहे.