द्राक्ष निर्यात वाढीसाठी पाठबळाची गरज : जगन्नाथ खापरे

नाशिक  : ‘‘जगातील प्रमुख द्राक्ष उत्पादक देशात निर्यातीसाठी पाठबळ मिळते. त्यामुळे तेथे अर्थकारणाला चालना मिळाली. मात्र, आपल्या देशात द्राक्ष निर्यातीसाठी धोरणांची कमतरता आहे. म्हणून निर्यात वाढीसाठी सरकारच्या पाठबळाची नितांत गरज आहे,’’ असे प्रतिपादन अखिल भारतीय द्राक्ष निर्यातदार संघटनेचे अध्यक्ष जगन्नाथ खापरे यांनी केले.  'महाएफपीओ' व 'कोगोपोर्ट'तर्फे नाशिक येथे ''निर्यातक्षम द्राक्षशेती, निर्यातीमधील अडचणी व उपाययोजना''या विषयावर मंगळवारी (ता.११) द्राक्ष निर्यात परिषदेचे आयोजन करण्यात आले. माजी कृषी आयुक्त डॉ. पांडुरंग वाठारकर, द्राक्ष बागायतदार संघाचे कोषाध्यक्ष कैलास भोसले, कृषी उपसंचालक नरेंद्र आघाव, उपविभागीय कृषी अधिकारी गोकूळ वाघ, आत्मा प्रकल्प उपसंचालक हेमंत काळे, कृषी शास्त्रज्ञ डॉ. रामनाथ जगताप, डॉ. नंदगिरीकर,'महा एफपीओ'चे डॉ. संजय पांढरे, भूषण निकम, प्रमोद देशमुख यांची प्रमुख उपस्थिती होती. 

निर्यात प्रक्रियेत कृषी विभागाचे लक्ष  ‘‘शेतमालाला चांगला दर मिळावा, म्हणून मागणी कायम राहण्यासाठी निर्यात करताना गुणवत्तापूर्ण मालाला प्राधान्य दिले पाहिजे. काही गैरप्रकार घडून उत्पादक व निर्यातदार यांचे नुकसान होऊ नये, यासाठी कृषी विभागाचे बारीक लक्ष राहील’’, असे कृषी उपसंचालक नरेंद्र आघाव यांनी सांगितले.