मनमाड बाजार समितीमध्ये नवीन मका विक्री सुरू

नाशिक : नांदगाव तालुक्यात मका काढणीला सुरवात झाली असून, नवीन काढलेला मका बाजारात विक्रीस येऊ लागला आहे. चालू वर्षी शासनाने १७६० रुपये क्विंटल असा हमीभाव मक्‍याला जाहीर केला आहे. मागील वर्षी हाच दर १७०० रुपये प्रतिक्विंटल होता. चालू वर्षी सरासरी २१०० रुपये प्रतिक्विंटल दर मिळत आहे. 

ज्या शेतकऱ्यांनी मका काढणी सुरू केली आहे अशा शेतकऱ्यांनी पुढील भांडवलासाठी विक्री सुरू केली आहे. अजून कळवण, सटाणा, उमराने, लासलगाव या बाजार समित्यांमध्ये नवीन मका लिलावाची सुरवात झालेली नाही. मनमाड बाजार समितीत आवक सुरू झाली आहे. लष्करी अळीचा प्रादुर्भाव मोठ्या प्रमाणावर झाल्याने पीक संरक्षणासाठी मोठा खर्च चालू वर्षी मका उत्पादकांना करावा लागला आहे. 

त्यामुळे उत्पादनखर्चात बियाणे, कीटकनाशके असा ६ ते ८ हजार प्रतिएकरी खर्च वाढला. त्यातच दरवर्षी सरासरी १५ पोते एकरी उत्पादन मिळते. मात्र, चालू वर्षी हेच उत्पादन ८ ते ९ पोत्यांवर आल्याचे नांदगाव तालुक्यातील शेतकरी सांगत आहेत. त्यामुळे एकरी जरी ५ क्विंटलप्रमाणे उत्पादन घटले तरी चालू बाजारभावाप्रमाणे एकरी ८ ते १० हजार रुपयांचा तोटा सहन करावा लागणार आहे.

मागील वर्षाच्या तुलनेत दोन आठवडे उशिरा मका बाजारात विक्रीसाठी आला आहे. त्यामुळे मक्याच्या प्रतवारीनुसार भाव देण्यात येत आहे. शेतकऱ्यांना चालू हंगामासाठी पैशांची गरज असल्याने मालाची चुकवती रोख स्वरूपात करण्यात सुरवात झाली आहे. हंगाम चांगला होईल खात्री आहे. - प्रतीक बंब, मका व्यापारी, मनमाड कृषी उत्पन्न बाजार समिती

लष्करी अळीमुळे मक्याची वाढ झाली नाही. त्यात प्रादुर्भाव अधिक असल्याने एकरी पाच पोते उत्पादन कमी झाले. औषध व फावरण्यांचा खर्च वाढला. मात्र यंदा उत्पन्न घटणार आहे.  - गोपीनाथ बागूल,  मका उत्पादक शेतकरी, सावरगाव, ता. नांदगाव