नव्या हंगामातील पपई लवकरच बाजारात; चांगल्या दरांची अपेक्षा

जळगाव  ः नव्या हंगामातील पपईची काढणी येत्या १५ ते २० दिवसांत सुरू होणार आहे. यंदही शेतकऱ्यांनी उत्पादन खर्चाच्या तुलनेत दर मिळण्याची अपेक्षा व्यक्त केली आहे. अतिपावसाने नंदुरबार, धुळे भागात काढणीस काहीसा उशीर होऊ शकतो, असेही सांगितले जात आहे.  पपईची काढणी खानदेशात दिवाळीपूर्वी अनेक भागांत सुरू होते. पपई लागवडीसाठी नंदुरबारमधील शहादा, तळोदा, अक्कलकुवा, धुळ्यातील शिरपूर व शिंदखेडा आणि जळगावमधील यावल, रावेर, चोपडा, मुक्ताईनगर हा भाग प्रसिद्ध आहे. सर्वाधिक सुमारे तीन हजार हेक्‍टरवर लागवड नंदुरबारात झाली आहे. यापाठोपाठ सुमारे दीड हजार हेक्‍टरवर लागवड धुळ्यात झाली आहे. तर जळगाव जिल्ह्यातही सुमारे १२०० ते १३०० हेक्‍टरवर पपई आहे. मागील मार्च व एप्रिल महिन्यांत लागवड केलेल्या पपई पिकात फळधारणा व फुलेही जोमात लगडली आहेत. मागील व या महिन्यात पपई पट्ट्यात पावसाने धुमाकूळ घातला. यामुळे फुलांचे नुकसान झाले. फुलगळ झाली व फळांची वाढही थांबली. धुळ्यातील शिरपूर, नंदुरबारमधील शहादा, तळोदा भागात काळ्या कसदार जमिनीत झाडांनाही अतिपावसाचा फटका बसला. परंतु हलक्‍या किंवा पाण्याचा निचरा व्यवस्थित होणाऱ्या जमिनीत पपईची वाढ बऱ्यापैकी झाली आहे. त्यात येत्या १५ ते २० दिवसांत फळे पक्व होऊन पहिली काढणीदेखील होईल. यंदा दर जाहीर झालेले नाहीत. पपईची थेट शेतात (खेडा) खरेदीचा प्रघात खानदेशात सर्वत्र आहे. बाजार समितीत रोज आवक फारशी शेतकऱ्यांकडून होत नाही. मागील हंगामात सुरुवातीला प्रतिकिलो १६ ते १७ रुपये दर थेट जागेवर शेतकऱ्यांना मिळाला होता. यंदाही किमान १८ ते २० रुपये प्रतिकिलोचा दर थेट शेतात किंवा जागेवरच दर्जेदार फळांसाठी मिळावा, असे शेतकरी रोहित पटेल (शहादा) म्हणाले.