कुंडीत वाढणारी सुगंधी निशिगंधाची जात विकसित

पुणे ः व्हर्टीकल गार्डन, लॅन्डस्केप आणि घरात ठेवण्यासाठी उपयुक्त अशा बाजारपेठेची गरज ओळखून पुष्पसंशोधन संचालनालयाने निशिगंधाची जात विकसित केली आहे. ही जात छोट्या उंचीची आणि जास्त सुंगध देणारी आहे. तीन वर्षांच्या संशोधनानंतर स्थानिक प्रक्षेत्रात यशस्वी झालेल्या या जातींच्या अन्य तीन राज्यांमध्ये चाचण्या घेऊन, लवकरच प्रसारित करण्यात येणार आहे, अशी माहिती संचालनालयाचे संचालक डॉ. के. व्ही. प्रसाद यांनी दिली.   पुष्पसंशोधन संचालनालयाचे मुख्यालय स्थापन झाल्यानंतर मांजरी येथील प्रक्षेत्रावर विविध फुलांवर संशोधन सुरू आहे. या संशोधन प्रक्षेत्रावर १५० पेक्षा जास्त गुलाब आणि २५ पेक्षा अधिक निशिगंधाच्या जातींवर संशोधन सुरू आहे. यामध्ये प्रामुख्याने शहरी बाजारपेठेची मागणी लक्षात घेता, घरामध्ये ठेवण्यासाठी लहान उंची आणि कुंडीत वाढ होणाऱ्या निशिगंधाच्या जातीवर संशोधन सुरू होते.   यासाठी  ‘फुले रजनी’ या शेतात उत्पादित होणाऱ्या जातीची मातृवृक्षाची निवड करून, याद्वारे कुंडीत वाढ होणाऱ्या जातीवर संशोधन सुरू होते. हे संशोधन अंतिम टप्पात आहे. मांजरी सह  राज्यातील संशोधन प्रक्षेत्रावर ही जात यशस्वी ठरली आहे. पुढील चाचण्या अन्य तीन राज्यांत करण्यात येणार असून, यानंतर ही जात प्रसारित करण्यात येईल. अद्याप या जातीचे नामकरण करण्यात आले नसून, अंतिम टप्प्यात याचे नामकरण केले जाईल, अशी माहिती डॉ. प्रसाद यांनी दिली. 

रोपवाटिका उद्योगांसाठी उपयुक्त  रोपवाटिका उद्योगांसाठी ही जात उपयुक्त ठरणार आहे. बाजारपेठेत सुगंधी फुलांच्या कुंड्याची मागणी वाढत आहे. मात्र, त्या तुलनेत फुलांच्या जाती उपलब्ध होत नाहीत. बागा, रुग्णालये, कार्यालये, घरामध्ये नैसर्गिक सुंगधासाठी ही जात फायदेशीर ठरेल. शहरातील नागरिकांकडून या जातीला चांगला प्रतिसाद मिळेल, असा विश्‍वास डॉ. प्रसाद यांनी व्यक्त केला.  अशी आहेत जातीची वैशिष्ट्ये