'पशुसंवर्धन'मध्ये अखेर नव्याने बदल्या

नागपूर ः विश्‍वासात न घेताच बदल्या केल्याचा ठपका ठेवत पशुसंवर्धनमंत्री महादेव जानकर यांनी सचिव अनुपकुमार यांनी केलेल्या बदल्या रद्दबातल ठरविल्या होत्या. एकूण ६६ बदल्या १ जून रोजी रद्दबातल ठरविल्यानंतर त्यातील सहायक आयुक्‍त दर्जाच्या २१ अधिकाऱ्यांच्या बदल्यांची पहिली यादी गुरुवारी (ता. १३) जाहीर करण्यात आली. पूर्वी या यादीत केवळ १५ अधिकाऱ्यांचा समावेश होता.  पशुसंवर्धन विभागातील अधिकाऱ्यांच्या बदल्यांचे आदेश ३१ मे रोजी काढण्यात आले होते. त्यानुसार नागपूर विभागातील ३७, कोंकण-२ विभागातील १४ पशुधन विकास अधिकाऱ्यांच्या बदल्या करण्यात आल्या होत्या. त्यासोबतच सहाक आयुक्‍त पशुसंवर्धन (गट-अ) दर्जाच्या १५ अधिकाऱ्यांच्याही बदल्या त्या वेळी करण्यात आल्या. परंतु यातील अनेकांना त्यांच्या मर्जीप्रमाणे गावे न मिळाल्याने त्यांनी आपल्या भागातील लोकप्रतिनिधींमार्फत पशुसंवर्धन मंत्र्यांकडे तक्रारी केल्या. त्यानंतर पशुसंवर्धनमंत्र्यांनी या बदल्यांना १ जून रोजी स्थगिती दिली होती. सुमारे २१ अधिकाऱ्यांच्या बदल्यांची पहिली यादी गुरुवारी (ता. १३) जारी करण्यात आली. पूर्वी सहायक पशुधन आयुक्‍तांच्या यादीत केवळ १५ अधिकाऱ्यांचा समावेश होता. आता सहा जणांची नावे वाढल्याने अनेकांच्या भुवया उंचावल्या आहेत. सक्षम प्राधिकारी यांच्या आदेशान्वये या बदल्या करण्यात आल्या, असेही आदेशात नमूद आहे. मे महिन्यातील बदल्याचा हंगाम चुकल्यास त्यानंतर होणाऱ्या बदल्या या मुख्यमंत्र्यांच्या मान्यतेने होतात. त्यामुळे या बदल्यांचे आदेश पशुसंवर्धनमंत्री की मुख्यमंत्र्यांनी काढले याविषयी तर्कवितर्क लावले जात आहेत.  सहा जणांचा अतिरिक्‍त समावेश डॉ. उमेश शालीग्राम हिरडकर यांची पूर्वीच्या बदली आदेशात नागपूर येथील रामटेकला बदलीचे आदेश होते. नव्या आदेशात मात्र त्यांना उमरेडला नियुक्‍ती देण्यात आली आहे. अरविंद गुलाबराव ठाकरे याचे नावच पूर्वीच्या बदली आदेशात नव्हते. त्यांना नव्या आदेशात स्थान देण्यात आले असून त्यांची नियुक्‍ती रामटेकवरून नागपूरला करण्यात आली आहे. अशा प्रकारे तब्बल सहा जणांचा नव्याने बदली आदेशात समावेश आहे.