नगर जिल्ह्यात नव्याने होणार ३७ हजारांवर शौचालये

नगर : बेसलाइन सर्वेक्षणानुसार राज्यात शौचालयांची बांधकामे पूर्ण करून हागणदारीमुक्तीची घोषणा झाली. मात्र, काही वाढीव कुटुंबांकडे शौचालये नसल्याची बाब निदर्शनास आली. त्यानंतर सर्वेक्षण करून सरकारने या कुटुंबांची संख्या जाहीर केली. यात जिल्ह्यात ३७ हजार १२३ कुटुंबे आढळली, जी वाढीवमध्ये गणली गेली. आता त्या कुटुंबांनी शौचालये बांधावीत, यासाठी प्रयत्न सुरू असल्याची माहिती जिल्हा परिषदेच्या पाणी व स्वच्छता विभागातून देण्यात आली. 

राज्यात २०१२ मध्ये झालेल्या बेसलाइन सर्वेक्षणानुसार शौचालयांची बांधकामे करण्यात आली. ती कामे पूर्ण झाल्याचे स्पष्ट करीत राज्य सरकारने घाईने राज्य हागणदारीमुक्त झाल्याची घोषणा केली. ग्रामीण भागात सामान्य, गरीब कुटुंबांनी शौचालये बांधावीत, यासाठी सरकारने प्रत्येकी १२ हजारांचे अनुदान दिले. मात्र, अनेक कुटुंबांची नावे बेसलाइन सर्वेक्षणात नसल्याने, ती कुटुंबे ग्राह्य न धरता हागणदारीमुक्तीची घोषणा झाली.

ही घोषणा झाल्यानंतरही राज्यातील अनेक कुटुंबांकडे शौचालये नसल्याचे समोर आले. त्यामुळे सरकारने सहा महिन्यांपूर्वी पुन्हा वाढीव कुटुंबांचे सर्वेक्षण केले. राज्यातील या कुटुंबांची संख्या नुकतीच जाहीर केली. नगर जिल्ह्यात अशी ३७ हजार १२३ कुटुंबे आढळली. बेसलाइन सर्वेक्षणानुसार शौचालये बांधल्यास प्रत्येकी बारा हजारांचे अनुदान दिले जात आहे.