साताऱ्यात पुढील वर्षी सहकारी संस्थांची रणधुमाळी

election
election

सातारा  : आगामी वर्ष हे सहकारातील विविध संस्थांच्या निवडणुकीच्या रणधुमाळीत जाणार आहे. यामध्ये सर्व कृषी उत्पन्न बाजार समितींसह कऱ्हाडचा कृष्णा, सह्याद्री कारखाना, भुईंजचा किसन वीर साखर कारखाना आणि जिल्हा मध्यवर्ती सहकारी बॅंकेच्या निवडणुकीचा समावेश आहे. सध्याच्या राजकारणातील बदलत्या परिस्थितीत सहकारातील या महत्त्वाच्या संस्थांच्या निवडणुकांत भाजपसह शिवसेना, राष्ट्रवादी आणि काँग्रेस लक्ष घालणार आहेत. 

केंद्र शासनाने बाजार समित्या बरखास्त करण्याची भूमिका घेतली आहे. मात्र, त्यापूर्वी सर्व राज्यांकडून अहवाल मागितला आहे. सर्व बाजार समित्यांनी पणन मंडळाला आपला अहवाल देण्यास सुरवात केली आहे. पुढील वर्षांत ऑगस्टमध्ये होणाऱ्या बहुतांशी कृषी उत्पन्न बाजार समित्यांच्या निवडणुकीत आता स्थानिक आमदारांसह पक्षांकडूनही लक्ष घातले जाणार आहे. या विधानसभा निवडणुकीत सातारा, माण-खटावमध्ये भाजप, कोरेगाव, पाटणमध्ये शिवसेनेचा तर उर्वरित फलटण, वाई, कऱ्हाड उत्तरमध्ये राष्ट्रवादी तर कऱ्हाड दक्षिणेत काँग्रेसचे उमेदवार विजयी झाले आहेत. त्यामुळे स्थानिक आमदारांकडून त्या-त्या ठिकाणच्या बाजार समित्यांवरील आपली सत्ता कायम राहावी, यासाठी प्रयत्न होणार असल्याने ही निवडणूक त्यांच्यासाठी प्रतिष्ठेची असेल.

तसेच जिल्ह्यातील महत्त्वाच्या तीन सहकारी साखर कारखान्यांची निवडणूक होणार आहे. त्यामध्ये किसन वीर, कृष्णा आणि सह्याद्री साखर कारखान्यांचा समावेश आहे. सध्या भाजपने जिल्ह्यात रोवलेले पाय लक्षात घेता या तीनही कारखान्यांच्या निवडणुकीत भाजपकडून पॅनेल असेल. ‘किसन वीर’ची निवडणूक मे महिन्यात तर कृष्णा कारखान्याची निवडणूक जुलैमध्ये होईल. तसेच सह्याद्री कारखान्याची निवडणूक मार्च, एप्रिलमध्ये होणार आहे. हे तिन्हीही कारखाने राष्ट्रवादी व भाजपसाठी महत्त्वपूर्ण आहेत.

सर्वांत महत्त्वाच्या निवडणुकीत सातारा जिल्हा मध्यवर्ती सहकारी बॅंकेचा समावेश आहे. जिल्हा बॅंकेच्या निवडणुकीत यावेळेस भाजपचे किती संचालक बॅंकेत येणार, याची उत्सुकता आहे. विकास सेवा सोसायटी मतदारसंघ यासाठी महत्त्वाचा आहे. सध्या जिल्हा बॅंकेचे अध्यक्ष शिवेंद्रसिंहराजे भोसले यांच्यासह संचालक जयकुमार गोरे, कांचन साळुंखे, प्रकाश बडेकर, माजी खासदार उदयनराजे भोसले हे भाजपमध्ये आहेत. त्यामुळे हे सर्व मिळून भाजपची ताकद जिल्हा बॅंकेत वाढविण्याच्या दृष्टीने प्रयत्न करतील. राष्ट्रवादीकडून जिल्हा बॅंकेची सत्ता अबाधित राखण्यासाठीही प्रयत्न होतील. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com