नांदेड विभागात साडेनऊ लाख क्विंटलवर साखर उत्पादन

नांदेड : प्रादेशिक साखर सहसंचालक कार्यालयातंर्गंत नांदेड विभागातील परभणी, हिंगोली, नांदेड, लातूर या चार जिल्ह्यांतील १३ साखर कारखान्यांनी यंदाच्या गाळप हंगामामध्ये बुधवार (ता. ८) पर्यंत ९ लाख ९९ हजार ४७ टन उसाचे गाळप केले. सरासरी ९.७८ टक्के उताऱ्याने ९ लाख  ७७ हजार ५० टन साखरेचे उत्पादन घेतले आहे.

नांदेड विभागातील चार जिल्ह्यांतील यंदाच्या हंगामात ऊस गाळपाचे परवाने मिळालेल्या १७ पैकी १३ साखर कारखान्यांनी बुधवार (ता. ८) पर्यंत केलेल्या ऊस गाळपाची माहिती प्रादेशिक साखर सहसंचालक कार्यालयास सादर केली. त्यानुसार परभणी जिल्ह्यातील ५ पैकी ३ खासगी साखर कारखान्यांनी २ लाख २२ हजार २४५ टन उसाचे गाळप केले. सरासरी ९.४२ टक्के उताऱ्याने २ लाख ९३ हजार ३४० क्विंटल साखर उत्पादन घेतले. 

पूर्णा तालुक्यातील बळिराजा शुगर्सचा साखर उतारा सर्वाधिक १०.१९ टक्के आला आहे. हिंगोली जिल्ह्यातील ३ सहकारी आणि १ खासगी साखर कारखान्याने ३  लाख १४ हजार ९४७ टन उसाचे गाळप केले. सरासरी १०.४६ टक्के उताऱ्याने ३ लाख २९ हजार ३०० क्विंटल साखर उत्पादन घेतले. शिरूर कारखान्याचा साखर उतारा सर्वाधिक ११.१२ टक्के आला. नांदेड जिल्ह्यातील ४ पैकी २ सहकारी आणि २ खासगी साखर कारखान्यांनी एकूण २ लाख ७३ हजार ६८५ टन उसाचे गाळप केले. सरासरी ९.४९ टक्के साखर उताऱ्याने २ लाख ५९ हजार ६५० क्विंटल उत्पादन घेतले.

भाऊराव चव्हाण सहकारी साखर कारखान्याचा (युनिट ४) साखर उतारा सर्वाधिक १०.०८ टक्के आला आहे. लातूर जिल्ह्यातील २ सहकारी आणि २ खासगी साखर कारखान्यांनी १ लाख ८८ हजार १७० टन उसाचे गाळप केले. सरासरी ९.५२ टक्के साखर उताऱ्याने १ लाख ७९ हजार ५० क्विंटल साखर उत्पादन घेतले. सिध्दी शुगर्सचा साखर उतारा सर्वाधिक ९.४१ टक्के आला.

ऊस गाळप, साखर उत्पादन, साखर उतारा