'आणखी साखर तयार कराल, तर खड्ड्यात जाल'

'आणखी साखर तयार कराल, तर खड्ड्यात जाल'
'आणखी साखर तयार कराल, तर खड्ड्यात जाल'

विटा, जि सांगली : पाणी आले म्हणून साखरेचे उत्पादन न घेता इथेनॉल निर्मिती करा, तरच पश्‍चिम महाराष्ट्र वाचेल. साखरेचे उत्पादन घेत बसला तर तुम्हाला वाचवण्याची ताकद सरकारमध्ये नाही. आणखी खड्ड्यात जाल, असा इशारा केंद्रीय परिवहनमंत्री नितीन गडकरी यांनी दिला.  सांगली लोकसभा मतदारसंघातील प्रचाराचा समारोप रविवारी (ता. २१) झाला. भाजप-शिवसेना महायुतीचे उमेदवार खासदार संजय पाटील यांची विट्यात प्रचार सांगता सभा महात्मा गांधी मैदानावर झाली. या वेळी श्री. गडकरी बोलत होते. महसूलमंत्री चंद्रकांत पाटील, उमेदवार संजय पाटील उपस्थित होते. मंत्री नितीन गडकरी म्हणाले, की टेंभू योजनेचे पाणी आलेले पाहून आनंद वाटला. यामुळे पिकांना पाणी उपलब्ध असेल. पण पाणी आले म्हणून ऊस लावून साखरेचे उत्पादन घेऊ नका. ब्राझीलमध्ये साखरेचे भाव २० रुपये असताना आम्ही ३४ रुपये धरून उसाला दर दिला आहे. पीक पद्धतीत लक्ष घातले नाही तर पुढच्या काळात आणखी फजिती झाल्याशिवाय राहणार नाही. ऊसापासून मळीचे उत्पादन वाढवून इथेनॉलचे उत्पादन घ्या. जेवढे इथेनॉल कराल तेवढे सरकार विकत घेईल. साखरेचे उत्पादन वाढवून आपण खड्ड्यात जाऊ. स्वाभिमानी शेतकरी संघटनेचे खासदार राजू शेट्‌टी यांच्यावर टीका करताना ते म्हणाले, की प्रश्‍न समजून न घेता आंदोलन कराल तर साखर कारखाने बंद पडतील. मग शेतकरी कुणाला ऊस विकणार? कारखानदारांनी किती चुका केल्या, भ्रष्टाचार केला त्यावर कारवाई करायला हरकत नाही. पण, साखर कारखानदारी किफायतशीर नाही. कारखानदारांचे प्रश्‍न समजून घ्या. शेतकऱ्यांचे कल्याण झाले पाहिजे, त्यांना पैसे मिळाले पाहिजेत.  ते म्हणाले, की इथेनॉलचे अर्थकारण मजबूत केले पाहिजे. बायोडिझेल, बायोप्लॅस्टिकचे उत्पादन घेतल्यास शेतकऱ्यांची गरिबी हटल्याशिवाय राहणार नाही. शेतकरी समृद्ध, संपन्न झाला पाहिजे. तरुणांना रोजगार मिळेल. हे करण्यासाठी केंद्रात नरेंद्र मोदी सरकार योग्य आहे.  ..तेव्हा माझे वाक्‍य आठवेल श्री. गडकरी म्हणाले, की मला माहिती आहे पाणी आले की ऊस लावाल. माझे ऐकणार नाही. पण साखर समुद्रात फेकावी लागेल इतके उत्पादन होईल, तेव्हा माझे वाक्‍य आठवेल.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com