पावसाची उघडीप; उन्हाचा चटका वाढला

पुणे : अरबी समुद्रातील परिसरात असलेले कमी दाबाचे क्षेत्राची तीव्रता वाढत जाऊन २४ तासांत त्याचे चक्रीवादळात रूपांतर होणार आहे. यानंतर ७२ तासांत ते ओमनच्या दिशेने सरकेल. यामुळे राज्यातील बहुतांशी भागांत पावसाने उघडीप दिली आहे. रविवारी (ता. २२) राज्यातील काही भागांत ऊन-सावल्यांचा खेळ सुरू होता. तर अनेक ठिकाणी ऊन पडल्याने चांगलाच चटका जाणवत होता. त्यामुळे वातावरणात काही प्रमाणात उकाड्यात वाढ झाली. बंगालच्या उपसागरात चक्राकार वाऱ्याची स्थिती आहे. यामुळे सोमवार व मंगळवारी काही प्रमाणात हवामान ढगाळ राहणार असून, तुरळक ठिकाणी हलका ते मध्यम स्वरूपाचा पाऊस पडण्याची शक्यता आहे. तसेच विदर्भात तुरळक ठिकाणी जोरदार पाऊस पडण्याचा अंदाज हवामान विभागाच्या सूत्रांनी वर्तविला आहे.  परतीच्या पावसाचा प्रवास सुरू होण्यास काही दिवसाचा कालावधी बाकी असताना राज्यातील वातावरणात वेगाने बदल होत आहे. अनेक भागात उन्हाचा चटका वाढत असताना काही ठिकाणी पावसाच्या अधूनमधून सरी बरसत आहे. यामुळे कमाल तापमानात चढउतार होत आहेत. रविवारी (ता. २२) सकाळी आठ वाजेपर्यंतच्या चोवीस तासांत ब्रह्मपुरीत सर्वाधिक ३३.९ अंश सेल्सिअस एवढ्या कमाल तापमानाची नोंद झाली आहे. तसेच इतर ठिकाणीही कमाल तापमान सरासरीएवढेच होते.  रविवारी सकाळी आठ वाजेपर्यंत मध्य महाराष्ट्रातील काही ठिकाणी हलक्या ते मध्यम स्वरूपाच्या सरी कोसळल्या होता. येवला येथे सर्वाधिक ६९ मिलिमीटर पाऊस पडल्याची नोंद झाली. विदर्भातील भिवापूर येथे ६० मिलिमीटर पाऊस पडला. तर ब्रह्मपुरी, मूल, गोंदिया, सावळी, कुही, मौदा, पेरसेवनी, करंजलाड, मंगळूरपीर, भंडारा या ठिकाणी पावसाच्या मध्यम स्वरूपाच्या सरी कोसळल्या. मराठवाड्यातही तुरळक ठिकाणी हलक्या सरी पडल्या असून, मध्य महाराष्ट्रात कोपरगाव येथे ४७ मिलिमीटर पाऊस पडला. पाथर्डी, राहाता, शेवगाव येथेही हलका पाऊस पडला. कोकणातील खेड येथे ३४ मिलिमीटर पाऊस पडला. तर भिरा, श्रीवर्धन, सुधागडपाली अशा तुरळक ठिकाणी हलका पाऊस पडला.   रविवारी (ता. २२) सकाळी आठ वाजेपर्यंत पडलेला पाऊस, मिलिमीटरमध्ये (स्रोत हवामान विभाग) :