ग्रामसेवकांचे आजपासून असहकार आंदोलन

अकोला ः ग्रामसेवकांच्या मागण्यांबाबत शासनाकडून कोणतीही उपाययोजना केली जात नसल्याने ग्रामसेवक संघटनेने राज्यात आजपासून (ता. ९) असहकार आंदोलन जाहीर केले आहे. २४ ऑगस्टपर्यंत हे आंदोलन विविध टप्प्यांवर केले जाणार आहे. याबाबत ग्रामसेवक संघटनेच्या प्रदेश तसेच जिल्हा संघटनांनी संबंधित अधिकाऱ्यांना निवेदन देऊन अवगत केले असल्याची माहिती संघटनेचे सरचिटणीस प्रशांत जामोदे यांनी दिली.

राज्यातील २२ हजार ग्रामसेवकांचे प्रश्न वर्षानुवर्षे प्रलंबित आहेत. गावपातळीवर समकक्ष काम करणाऱ्या राज्य शासन, जिल्हा परिषद कर्मचाऱ्यांच्या तुलनेत ग्रामसेवकांना अधिक काम असतानाही इतरांच्या तुलनेत वेतनात असमानता आहे. पदोन्नतीची संधी नाही. इतर फायदेसुद्धा मिळत नाहीत. इतर विभागांच्या अनेक कामांसाठी ग्रामसेवकांवर सक्ती केली जाते. ग्रामसेवक तणावग्रस्त होऊन त्यांच्या आरोग्यावर परिणाम होत आहेत. शासनाने ग्रामसेवकांच्या मागण्यांबाबत विचार न केल्याने आंदोलन छेडण्यात आले आहे. समान काम-समान दाम, समकक्ष पदे-समान वेतनश्रेणी, ग्रामसेवकांच्या शैक्षणिक अर्हता बदल करणे, लोकसंख्या आधारित ग्रामविकास अधिकारी पदात वाढ करणे, वेतनत्रुटी दूर करणे, २००५ नंतरच्या ग्रामसेवकांना जुनी पेन्शन योजना लागू करणे, आदर्श ग्रामसेवकांना आगाऊ एक वेतनवाढ देणे, ग्रामसेवक युनियनचे महाअधिवेशन घेणे, अतिरिक्त कामे कमी करणे आदी मागण्यांसाठी हे आंदोलन छेडण्यात आले आहे. 

याबाबत संघटनेचे प्रदेशाध्यक्ष एकनाथ ढाकणे, कोशाध्यक्ष निकम, विभागीय सहसचिव शेख चॉंद कुरेशी, डॉ. उल्हास मोकळकर यांच्यासह प्रत्येक जिल्हा संघटनांनी अधिकाऱ्यांना निवेदन देऊन इशारा दिला आहे.

असे होईल आंदोलन ९ ऑगस्ट ः राज्यातील पंचायत समित्यांसमोर धरणे आंदोलन.  १३ ऑगस्ट ः जिल्हा परिषदांसमोर धरणे. १६ ऑगस्ट ः विभागीय आयुक्त कार्यालयांसमोर आंदोलन.  १८ ऑगस्ट ः पालकमंत्र्यांच्या घरासमोर एकदिवसाचे उपोषण.  २२ ऑगस्ट ः असहकार आंदोलन करून त्यानंतर कामबंद आंदोलन सुरू होईल. २४ ऑगस्ट ः ग्रामविकास मंत्री, प्रधान सचिवांच्या घरासमोर एक दिवसाचे उपोषण.