परभणीत व्यापाऱ्यांचे असहकार आंदोलन सुरूच

परभणीत व्यापाऱ्यांचे असहकार आंदोलन सुरूच
परभणीत व्यापाऱ्यांचे असहकार आंदोलन सुरूच

परभणी ः परभणी कृषी उत्पन्न बाजार समितीअंतर्गत आधारभूत किमतीपेक्षा कमी दराने खरेदी करणाऱ्या चार अडत व्यापाऱ्यांवरील परवाने रद्दची कारवाई थांबवावी, या मागणीसाठी मार्केट व्यापारी महासंघाने मंगळवारपासून (ता. १८) सुरू केलेले असहकार आंदोलन चौथ्या दिवशी शुक्रवारी (ता. २१) देखील सुरू होते. त्यामुळे भुसार मालाच्या खरेदी-विक्रीचे व्यवहार ठप्प होते. अडत व्यापाऱ्यांचा बंद, तसेच शासकीय हमीभाव खरेदी केंद्र सुरू नसल्यामुळे शेतकऱ्यांची मोठी गैरसोय होत आहे.

जिल्हा उपनिबंधक (सहकारी संस्था) मंगेश सुरवसे यांनी अडत दुकांनाची तपासणी केली असता हमीभावापेक्षा कमी दराने खरेदी करत असल्याचे आढळून आल्यामुळे चार व्यापाऱ्यांचे परवाने रद्द करावेत, असे आदेश बाजार समितीला दिले होते.परंतु व्यापारी बाजार समितीच्या नियमानुसार खरेदी- विक्रीचे व्यवहार करत असताना शेतकरी संघटनेच्या पदाधिकाऱ्यांच्या म्हणण्यानुसार जिल्हा उपनिबंधकांनी अडत दुकानांवर धाड सत्र सुरू केले आहे. व्यापारीवर्गाचे म्हणणे न ऐकता चार व्यापाऱ्यांचे परवाने रद्द केले, तर बाजार समितीअंतर्गतचे सर्व परवानाधारक व्यापारी बाजार समितीकडे परवाने जमा करतील. या व्यापाऱ्यांवरील कारवाई मागे घेतली जात नाही, तोपर्यंत अडत दुकाने बंद ठेवण्यात येतील, असे परभणी मार्केट व्यापारी असोसिएशनचे अध्यक्ष मोतीलाल जैन, उपाध्यक्ष गोविंदप्रसाद अजमेरा यांनी बाजार समितीचे सभापती, तसेच सचिव यांना निवेदनाद्वारे कळविले होते.

दरम्यान, गेल्या चार दिवसांपासून शेतीमालाची खरेदी बंद आहे. हमीभाव खरेदी केंद्रही सुरू नाही. त्यामुळे व्यापाऱ्यांना शेतीमालाची खरेदी सुरू करण्याच्या सूचना द्याव्यात, खरेदी सुरू न करणाऱ्या व्यापाऱ्यांवर नियमानुसार कारवाई करावी, असे निर्देश जिल्हा उपनिबंधक कार्यालयाने बाजार समितीस दिले आहेत.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com