राज्यात सर्वदूर हलक्या पावासाची शक्यता

पुणे ः राज्यातील अनेक भागांत कमी अधिक स्वरूपात पाऊस पडत आहे. पुढील पाच ते सहा दिवस राज्यात काही ठिकाणी पावसाच्या हलक्या सरी पडण्याचा अंदाज हवामान विभागाच्या सूत्रांनी वर्तविला. 

गेली आठ ते दहा दिवस कोकण, मध्य महाराष्ट्र व मराठवाड्यात पावसाने चांगलीच दाणादाण उडवली होती. अजूनही मध्य महाराष्ट्र व मराठवाड्यात जोरदार पाऊस पडत आहे. मात्र, काही भागांत सकाळपासून ऊन पडत आहे. दुपारनंतर अचानक ढगाळ वातावरणाची स्थिती होत आहे. त्यामुळे उकाड्यात चांगलीच वाढ होत आहे. पूर्व विदर्भातील चंद्रपूर येथे ३५.२ अंश सेल्सिअसची सर्वाधिक कमाल तापमानाची नोंद झाली होती. 

सध्या मध्य महाराष्ट्र ते कोमोरिन परिसर व कर्नाटक आणि केरळ दरम्यान काही प्रमाणात कमी दाबाचा पट्टा कार्यरत आहे. त्यामुळे कोकण व मध्य महाराष्ट्रात काही अंशी ढगाळ हवामान आहे. मंगळवारी (ता.२९) कोकण, मध्य महाराष्ट्र व मराठवाडा वगळता विदर्भातील काही भागात मध्यम स्वरूपाचा  पाऊस पडेल. तर बुधवारी (ता.३०) कोकणातील पालघर, मध्य महाराष्ट्रातील सातारा, सांगली, सोलापूर तर मराठवाड्यातील उस्मानाबाद व विदर्भात तुरळक ठिकाणी वादळी वारे व विजांसह जोरदार पाऊस पडेल. तर इतर भागात पावसाचा शिडकावा होण्याची शक्यता आहे. सध्या काही भागात काही अंशी ढगाळ राहणार असून अनेक भागात ऊन पडेल. त्यामुळे काही प्रमाणात उकाड्यात वाढ होऊन कमाल तापमानात वाढ होण्याचा अंदाज आहे.