सांगली जिल्ह्यातील पाच कारखान्यांना नोटिसा

सांगली ः गाळप हंगाम सन २०१८-१९ मध्ये गाळप झालेल्या उसाला एफआरपीची रक्कम १४ दिवसांत दिली नसल्याने सांगली जिल्ह्यातील पाच कारखान्यांवर महसूल वसुलीअंतर्गत कारवाई करण्याचे आदेश जिल्हाधिकारी कार्यालयाने संबंधित तहसीलदारांना दिले. 

कारवाईचे आदेश दिलेल्या कारखान्यांमध्ये केन ॲग्रो (रायगाव), श्री महांकाली (कवठेमहांकाळ), विश्‍वासराव नाईक (शिराळा), श्री दत्त इंडिया (सांगली), व निनाईदेवी (कोकरूड) या कारखान्यांचा समावेश आहे. महसूल विभागाचे तहसीलदार योगेश खरमाटे यांनी याबाबत आदेश दिले. 

जिल्ह्यातील पाच कारखान्यांनी २०० कोटी ६६ लाख ६४ हजार रुपये थकवले आहेत. स्वाभिमानी शेतकरी संघटनेच्या आंदोलनानंतर साखर आयुक्त शेखर गायकवाड यांनी दिलेल्या या आदेशामुळे जिल्ह्यात खळबळ उडाली आहे. 

जिल्हाधिकारी व प्रादेशिक साखर सहसंचालक कार्यालयाला हे आदेश मिळाले असून, ज्या-त्या तालुक्‍यातील तहसीलदारांकडून जप्तीची कारवाई होईल. सांगली जिल्ह्यातील विश्‍वासराव नाईक (शिराळा), केन ॲग्रो (रायगाव), निनाईदेवी-दालमिया (कोकरूड), श्री महांकाली (कवठेमहांकाळ), दत्त इंडिया (सांगली) या कारखान्यांवर जप्ती आदेश दिले आहेत.