मध्य प्रदेशात द्राक्ष लागवडीसाठी ‘एनआरसीजी‘चा पुढाकार

पुणे : मध्य प्रदेशातील बागायतदार शेतकरी आता द्राक्षशेतीकडे वळत आहेत. विशेष म्हणजे  या शेतकऱ्यांना आधुनिक द्राक्षबागा तयार करण्याचे धडे मांजरी येथील राष्ट्रीय द्राक्ष संशोधन केंद्राचे (एनआरसीजी) शास्त्रज्ञ करीत आहेत. मंदसोर येथील फलोत्पादन महाविद्यालय आणि एनआरसीजी यांच्या संयुक्त प्रयत्नातून अलीकडे एक द्राक्षलागवड कार्यशाळा शेतकरी राजेश पटेल यांच्या बागेत झाली. या वेळी प्रगतिशील शेतकरी मोठ्या संख्येने उपस्थित होते. मांजरी मेडिका आणि मांजरी शामा या दोन जाती या प्रांतात वाढण्यास संधी असल्याचे यावेळी स्पष्ट करण्यात आले. एनआरसीजीचे संचालक डॉ. आर. जी. सोमकुवर तसेच शास्त्रज्ञ डॉ. अजय उपाध्याय, डॉ. रोशनी समर्थ यांनी शेतकऱ्यांना मार्गदर्शन केले.