तिसऱ्या दिवशीही समुद्राला उधाण

सिंधुदुर्ग : वायुवादळामुळे समुद्राला आलेले उधाण शुक्रवारी (ता.१४) तिसऱ्या दिवशीही कायम होते. लाटा किनाऱ्यावर आदळत असून देवबाग येथील आठ मच्छीमारांच्या ५४ जाळ्यां वाहून गेल्या आहेत. किनारपट्टीला वाढलेला धोका लक्षात घेऊन जिल्हा प्रशासनाने मच्छीमार बांधवाना समुद्रात पूर्णतः बंदी केली असून पर्यटकांना देखील मनाई केली आहे. अरबी समुद्रात निर्माण झालेल्या वायुवादळामुळे आलेले उधाण तिसऱ्या दिवशीही कायम होते. लाटा किनाऱ्याला येऊन धडकत आहेत. त्यामुळे किनारपट्टीचे लोक जीव मुठीत धरून राहत आहेत. त्यांच्यावरील भितीचे सावट अद्याप दूर झालेले नाही. दरम्यान मालवण तालुक्यातील नवाबाग, दाभोली, वायगंणी, या भागातील पाण्याच्या पातळीत अचानक वाढ झाली. त्यामुळे देवबाग येथील आठ मच्छीमारांची अडीच लाख रुपये किमतीची ५४ जाळी वाहून गेली आहेत. यामध्ये गणपत केळुसकर-८ जाळी, नारायण वेंगुर्लेकर-७ जाळी, इच्छाराम मालवणकर-७ जाळी, श्‍यामसुंदर कोळकर-८ जाळी, प्रकाश मोठे-८ जाळी, दत्ताराम कोळकर-७ जाळी, मुकुंद खडपकर-७ जाळी, देंवेंद्र तांडेल-४ जाळी, या मच्छीमार बांधवांचा समावेश आहे. दरम्यान, समुद्र अजूनही खवळलेला असून अजस्र लाटा किनाऱ्याला धडकत आहे. वायुवादळाचा प्रभाव अजून काही दिवस राहण्याची शक्यता असल्यामुळे प्रशासनाने धोक्याचा तिसरा बावटा फडकवला आहे. मच्छीमार बांधवांना समुद्रात जाण्यास मज्जाव करण्यात आले असून समुद्रकिनारी पर्यटकांना देखील मनाई करण्यात आली आहे. मुसळधार पाऊस गुरुवारी सांयकाळी जिल्ह्यात मुसळधार पाऊस झाला. या पावसामुळे आंबोली, भुईबावडा, करूळ घाटमार्गावर दरडी कोसळण्याचे प्रकार घडले. त्यामुळे वाहतूक काही काळ विस्कळित झाली. गेले दोन तीन दिवस चांगला पाऊस होत असल्यामुळे शेतकऱ्यांनी भात पेरणीच्या कामाला सुरुवात केली आहे. ही पेरणी अंतिम टप्प्यात असून येत्या दोन तीन दिवसात भातपेरणीची कामे पूर्ण होण्याची शक्यता आहे.