ऑक्टोबर हीटचा चटका वाढतोय

पुणे: राज्यात बहुतांशी ठिकाणी तापमानच्या पाऱ्याने तिशी पार केली आहे. पावसाने दिलेल्या उघडिपीमुळे ढगांचे आच्छादन कमी होऊन ऑक्टोबर हीटचा चटका वाढू लागला आहे. सोमवारी (ता. ३०) विदर्भातील चंद्रपूर येथे सर्वाधिक ३४.४ अंश सेल्सिअस तापमानाचा नोंद झाली. आज (ता. १) मध्य महाराष्ट्रातील नंदूरबार, कोल्हापूर आणि सोलापूर जिल्ह्यात तुरळक ठिकाणी मेघगर्जना, विजांसह पाऊस पडण्याची शक्यता हवामान विभागाने वर्तविली आहे. कच्छचे आखात आणि परिसरावर असलेल्या ठळक कमी दाबाच्या क्षेत्र सोमवारी (ता. ३०) आणखी तीव्र झाले. सकाळपर्यंतच्या २४ तासांमध्ये विदर्भ, मराठवाड्यात तुरळक ठिकाणी मध्यम स्वरुपाचा पाऊस पडला, तर उर्वरित राज्यात हवामान मुख्यत: कोरडे होते. मध्य महाराष्ट्रातील पुणे, नाशिक, महाबळेश्वर वगळता राज्यात सर्वच ठिकाणी तापमान ३० अंशांच्या पुढे गेले आहे. सकाळपासून जाणवणारा उन्हाचा चटका दुपारी आणखीनच तीव्र होत आहे. पावसाची उघडीप कायम राहिल्यास तापमानात वाढ होणार आहे.

सोमवारी (ता. ३०) सकाळी साडेआठ वाजेपर्यंतच्या २४ तासांत राज्यातील विविध ठिकाणचे कमाल तापमान, कंसात सरासरीच्या तुलनेत वाढ, घट (अंश सेल्सिअसमध्ये) : पुणे २९.३ (-१.२), जळगाव ३३.२(-१.५), कोल्हापूर ३१.३ (१.२), महाबळेश्वर २१.६ (-२.२), मालेगाव ३३.२ (०.७), नाशिक २९.२ (-१.९), सांगली ३१.० (-०.२), सातारा ३०.५ (१.२), सोलापूर ३३.७ (१.३), अलिबाग ३०.७ (-०.१), डहाणू ३१.८ (०.३), सांताक्रूझ ३२.६ (१.१), रत्नागिरी ३१.६ (१.४), औरंगाबाद ३०.० (-१.४), परभणी ३२.९ (०.२), अकोला ३३.३ (-०.१), अमरावती ३०.४ (-१.६), बुलडाणा ३०.२ (-०.२), ब्रह्मपुरी ३४.० (१.२), चंद्रपूर ३४.४(१.०), गोंदिया ३०.०(-३.०), नागपूर ३२.४ (-०.९), वर्धा ३३.० (०.३), यवतमाळ ३२.०(-०.२).