नगर जिल्ह्यात साडेदहा हजार क्विंटल तूर, हरभरा खरेदी

नगर :  नगर जिल्ह्यात हमीदराने खरेदी सुरू केलेल्या तूर, हरभरा खरेदी केंद्रावर यंदा फारशी खरेदी झालेली नाही. हमीदराच्या तुलनेत बाजारात दर चांगले असल्याने खरेदीला फारसा प्रतिसाद मिळाला नाही. यंदा जिल्हाभरातील सात खरेदी केंद्रावर तुरीची सात हजार पाचशे तर हरभऱ्याची ३ हजार ३१०० क्विंटल खरेदी झाली आहे. सहा केंद्रांवर खरेदीच झाली नसल्याचे सांगण्यात आले.

बाजारात कमी दर मिळत असल्याने हमीदराने तूर, हरभऱ्याची खरेदी करण्यासाठी नगर जिल्ह्यात तेरा ठिकाणी हमी केंद्रे सुरू केली. तेरा केंद्रांपैकी सात केंद्रावरच तूर, हरभऱ्याची खरेदी झाली आहे. त्यात श्रीगोंदा केंद्रांवर ३५ शेतकऱ्यांकडून २३२ क्विंटल हरभरा तर ८३ शेतकऱ्यांकडून ६७१ क्विंटल तूर, कर्जत केंद्रावर ४१ शेतकऱ्यांकडून ४९५ क्विंटल हरभरा तर ४०२ शेतकऱ्यांकडून  ४०१८ क्विंटल तूर, मांडवगण केंद्रावर २५ शेतकऱ्यांकडून १५४ क्विंटल हरभरा तर ५१ शेतकऱ्यांकडून ४८० क्विंटल तूर, नगर केंद्रावर शेतकऱ्यांकडून ४६६ क्विटंल हरभरा, पाथर्डी केंद्रावर ११० शेतकऱ्यांकडून १११३ क्विंटल हरभरा तर १८२ शेतकऱ्यांकडून ८०६ क्विंटल तूर, राहुरी केंद्रावर ५९ शेतकऱ्यांकडून ५९२ क्विटंल हरभरा तर ५ शेतकऱ्यांकडून २८ क्विंटल तूर व साकत (नगर) केंद्रावर १२ शेतकऱ्यांकडून ७२ क्विंटल हरभरा तर ५२ शेतकऱ्यांकडून ४९३ क्विंटल तुरीची खरेदी झाली आहे.  

हरभरा विक्रीसाठी साडेतीन हजार तर तूर खरेदीसाठी तीन हजार आठशे शेतकऱ्यांनी नोंदणी केली होती. अकराशे शेतकऱ्यांकडून साडेदहा हजार क्विंटल तूर, हरभऱ्याची खरेदी झाली आहे. जामखेड, खर्डा, तिसगाव, पारनेर, संगमनेर, शेवगाव तालुक्यात खरेदीच झाली नाही, असे सांगण्यात आले.