सातारा जिल्ह्यातील आठ मतदारसंघांतून १६९ उमेदवारांचे अर्ज दाखल

सातारा  : जिल्ह्यातील आठ विधानसभा मतदारसंघांतून अंतिम मुदतीत एकूण १६९ उमेदवारांनी अर्ज दाखल केले आहेत. सोमवारी (ता. ७) उमेदवारी अर्ज मागे घेण्याची अंतिम मुदत आहे. त्यानंतर कोणत्या मतदारसंघात तिरंगी, चौरंगी लढती होणार हे स्पष्ट होईल. दरम्यान, माण मतदारसंघात भाजपमधून जयकुमार गोरे; तसेच शिवसेनेतून शेखर गोरे यांनी उमेदवारी अर्ज भरल्याने येथे युतीचा धर्म पाळला जाणार की निवडणूक लढवली जाणार हे पहावे लागणार आहे. 

विधानसभा निवडणुकीसाठी उमेदवारी अर्ज दाखल करण्याची मुदत शुक्रवारी संपली. या मुदतीत दिग्गज राजकारण्यांसह सामान्यांनी मोठ्या प्रमाणात आपले उमेदवारी अर्ज भरले आहेत. अर्ज भरण्याच्या अंतिम मुदतीत १६९ उमेदवारी अर्ज दाखल झाले आहेत. त्यामुळे अऩेक मतदारसंघांत तिरंगी, चौरंगी, पंचरंगी निवडणुका होणार असल्याचे स्पष्ट होत आहे. माजी मुख्यमंत्री पृथ्वीराज चव्हाण यांच्या मतदारसंघातून सर्वाधिक २९ उमेदवारी अर्ज दाखल झाले आहे. माण मतदारसंघात भाजपमधून जयकुमार गोरे; तसेच शिवसेनेतून शेखर गोरे यांनी उमेदवारी अर्ज भरल्याने येथे युतीचा धर्म पाळला जाणार की निवडणूक लढवली जाणार, हे सोमवारी स्पष्ट होणार आहे. जिल्ह्यातील सर्वच प्रमुख उमेदवारांनी शक्तिप्रदर्शन करीत अर्ज दाखल केल्याने निवडणुकीत रंगत येणार आहे. इच्छुकांची संख्या वाढली असल्याने अर्जांची संख्या वाढली आहेत. एकूण अर्जांमध्ये अनेक उमेदवारांनी दोन अर्ज दाखल केले आहेत. यामुळे अर्ज मागे घेण्याच्या दिवशी निवडणुकीचे अंतिम चित्र स्पष्ट होणार आहे. मात्र बहुतांशी मतदारसंघांत किमान तिरंगी लढत होण्याची शक्यता आहे.

विधानसभा मतदारसंघनिहाय दाखल अर्ज ः फलटण २१, वाई २४, कोरेगाव १६, माण २५, कराड (उत्तर) १७, कराड (दक्षिण) २९, पाटण २०, सातारा १७.  

लोकसभा पोटनिवडणुकीसाठी आठ उमेदवारांचे अर्ज  संपू्र्ण राज्याचे लक्ष लागून राहिलेल्या सातारा लोकसभेच्या पोटनिवडणुकीसाठी एकूण आठ जणांनी उमेदवारी अर्ज दाखल केले. माजी खासदार श्रीनिवास पाटील (राष्ट्रवादी), माजी खासदार उदयनराजे भोसले (भाजप), पुरुषोत्तम जाधव (अपक्ष), शिवाजी भोसले (अपक्ष), अलंकृता आवाडे-बिचुकले (अपक्ष), चंद्रकांत खंडाईत (वंचित बहुजन आघाडी), ॲड. शिवाजी जाधव (अपक्ष), दीपक ऊर्फ व्यंकटेश महास्वामी (हिंदुस्थान जनता पक्ष) यांनी अर्ज भरले आहेत. याही निवडणुकीचे अंतिम चित्र सोमवारी स्पष्ट होईल.