प्रत्येक गावात नेमणार भूजल सर्वेक्षणासाठी एक स्वयंसेवक 

नगर ः राज्य शासनाच्या पाणीपुरवठा व स्वच्छता विभागाने जिल्ह्यातील प्रत्येक गावात निरीक्षण विहीर निश्‍चित केली असून, या विहिरीतील निरीक्षणे नोंदविण्यासाठी प्रत्येक गावात एक स्वयंसेवक व कार्यकर्ते नेमण्यात येणार आहेत. या स्वयंसेवक व कार्यकर्त्यांना शासन मानधनही देणार आहे, अशी माहिती कनिष्ठ भूजल वैज्ञानिक डॉ. अजिंक्‍य काटकर यांनी दिली. 

जिल्ह्यात जलसंधारणाची कामे, भूजल पुनर्भरणासंबंधी जनजागृती, तसेच भूजल अधिनियमाबाबत जनसामान्यांना माहिती व प्रशिक्षण देण्यासाठी व भूजल पुनर्भरणाचे प्रकल्प राबविण्यासाठी हा उपक्रम सुरू करण्यात आला आहे. गाव पातळीवर काम करण्याची संस्थेची संकल्पना आहे. त्यासाठी जिल्ह्यातील प्रत्येक गावात काम करू इच्छित असलेल्या स्वयंसेवकांची तथा कार्यकर्त्यांची नेमणूक केली जाणार आहे. 

१८ ते ६० वयोगटातील दहावी उत्तीर्ण नागरिक यात सहभागी होऊ शकतात. सहभागी स्वयंसेवक व कार्यकर्त्यांना प्रकल्पनिहाय मानधनही दिले जाईल. या प्रकल्पासाठी समन्वयक म्हणून सोमनाथ सोनवणे यांची नियुक्‍ती करण्यात आली आहे.