नामपूरला कांदा आठआणे किलो; शेतकऱ्यांचे आंदोलन

नामपूरला कांदा आठआणे किलो; शेतकऱ्यांचे आंदोलन
नामपूरला कांदा आठआणे किलो; शेतकऱ्यांचे आंदोलन

नामपूर, जि. नाशिक : चारआणे, आठआणे चलनातून बाद झालेले असले तरी येथील बाजार समितीच्या आवारात लाल कांद्याला व्यापाऱ्यांनी आठ आणे प्रतिकिलो असा भाव दिल्याने संतप्त झालेल्या शेतकऱ्यांनी मालेगाव- ताहराबाद रस्त्यालगत बाजार समितीच्या प्रवेशद्वारासमोर कांदा ओतून आज सायंकाळी चार वाजता रास्ता रोको आंदोलन केले.

शेतकऱ्यांच्या आक्रमक भूमिकेमुळे आंदोलन काळात कांद्याचे लिलाव बंद होते. जायखेडा पोलिस ठाण्याचे सहायक निरीक्षक गणेश गुरव यांनी शेतकऱ्यांची समजूत काढून बाजार समिती प्रशासनाला शेतकऱ्यांना सरासरी भाव देण्याचे आदेश दिले. पोलिस प्रशासनाच्या मध्यस्तीनंतर रास्ता रोको आंदोलन मागे घेण्यात आले. 

गेल्या महिनाभरात नामपूर शहरात दर आठवड्याला एक आंदोलन होत असल्याने नामपूर आंदोलनाचे शहर बनले आहे. आज सकाळी कांद्याच्या लिलावाला सुरवात झाल्यानंतर साक्री तालुक्‍यातील एका शेतकऱ्याचा कांदा खराब असल्याच्या कारणास्तव कांदा व्यापाऱ्यांनी लिलाव करण्याचे नाकारले. त्यानंतर शेवाळी (ता. साक्री) येथील कांदा उत्पादक संदीप सालुंखे यांच्या लाल कांद्याला ५५ रुपये प्रतिकिलो असा भाव पुकारण्यात आल्यानंतर संतप्त झालेल्या शेतकऱ्यांनी कांदा व्यापाऱ्यांवर आपला रोष व्यक्त केला.

संतप्त झालेल्या संदीप साळुंखे या शेतकऱ्याने प्रशासनाचे लक्ष वेधण्यासाठी आपल्या वाहनातील कांदा बाजार समितीच्या प्रवेशद्वारासमोर ओतून दिला. त्यानंतर संतप्त शेतकऱ्यांनी रास्ता रोको आंदोलन करून राज्यमार्ग रोखून धरला. कांदा उत्पादक शशिकांत कोर, प्रवीण सावंत यांनी आपल्या तीव्र भावना व्यक्त करीत शासनाचा निषेध केला. रास्ता रोकोमुळे मालेगाव- ताहराबाद रस्त्यालगतची वाहतूक खोळंबली होती. आंदोलन काळात कोणताही अनुचित प्रकार घडला नाही. आंदोलनानंतर जेसीबीच्या साहाय्याने कांदा अन्य वाहनांत भरून फेकून देण्यात आला.

गेल्या तीन दिवसांपासून येथील मार्केटमध्ये कांदा विक्रीला आणला असून पन्नास पैसे प्रतिकिलोने ट्रॅक्‍टरचे डिझेलपण सुटणार नाही. मातीमोल भावाने कांद्याची विक्री होत असल्याने जगणे मुश्‍किल झाले आहे. शासनाने कांद्याला किमान एक हजार रुपये प्रतिक्विंटल रुपये अनुदान द्यावे.  - संदीप साळुंखे, कांदा उत्पादक शेतकरी, शेवाळी (ता. साक्री)

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com