‘नाफेड’साठी खरेदी केलेला कांदा चाळीतच सडला

नाशिक : केंद्राच्या भाव स्थिरीकरण योजनेअंतर्गत ‘नाफेड’च्या माध्यमातून राज्यात काही संस्था व शेतकरी उत्पादन कंपन्या यांच्या माध्यमातून कांदा खरेदी केली जाते. मे महिन्यात कांद्याची शेतकऱ्यांकडून थेट बांधावर खरेदी केल्यानंतर खरेदीदारांनी तो शेतकऱ्यांच्या चाळीतच भाडेतत्त्वावर साठवला. मात्र तो वेळीच न उचलल्याचे टिकवणक्षमता धोक्यात आली. त्यामुळे ८० टक्के कांद्याचे नुकसान झाले. मोठी दुर्गंधी पसरल्याने आरोग्य धोक्यात आल्याचा प्रकार सटाणा तालुक्यात समोर आला आहे. 

सटाणा तालुक्यातील चौगाव येथील शेतकरी नारायण नथू गांगुर्डे यांच्याकडून सटाणा तालुक्यातील संस्थेने नाफेडची खरेदी असल्याचे सांगून ४०० क्विंटल कांदा मे महिन्यात खरेदी केला. त्यानंतर भाडेतत्त्वावर तुमच्या चाळीत ठेवा अशी विनंती केली. त्यानंतर सप्टेंबर महिन्यात या कांद्याची सड होऊ लागल्यानंतर हा कांदा उचलून घ्या, याबाबत गांगुर्डे यांनी पाठपुरावा केला. मात्र खरेदीदाराने त्याकडे दुर्लक्ष केले. परिणामी, ऑक्टोबर महिन्यापासून सड गतीने होऊन ८० टक्के सड झाली. 

या बाबत समाज माध्यमातून चर्चा झाल्यानंतर हा कांदा उचलून नेला. मात्र नंतर चाळीत कुठलीही साफसफाई तर नाहीच शिवाय कांदा चाळ भाडे अदा न केल्याने शेतकऱ्याची फसवणूक झाली आहे. ‘नाफेड’च्या नावाचा वापर करून परवाने नसलेले घटक खरेदी करत असल्याची शंका उपस्थित झाली आहे. या प्रकारात ‘‘ना खरेदीची बिले दिली गेली, ना भाडे’’ अशी परिस्थिती आहे. असे असताना खरेदीदार शेतकऱ्यालाच दमबाजी करून व फौजदारी दाखल करण्याची धमकी देत असल्याचे संबंधित शेतकऱ्यांनी सांगितले.

चाळी भाडेतत्त्वावर घेऊन शेतकऱ्यांच्या अडचणी वाढवल्या. त्यामुळे खरेदी व साठवणूक केलेल्या कांद्याच्या प्रकरणात गैरप्रकार चव्हाट्यावर येत आहेत. नाफेडने याप्रश्‍नि सखोल चौकशी करावी. - कुबेर जाधव, संपर्क प्रमुख, राज्य कांदा उत्पादक शेतकरी संघटना