चांदवड येथे शेतकरी संघटनेची कांदा परिषद होणार : घनवट

चांदवड येथे शेतकरी संघटनेची कांदा परिषद होणार : घनवट
चांदवड येथे शेतकरी संघटनेची कांदा परिषद होणार : घनवट

नाशिक  : केंद्रीय अन्न व नागरी पुरवठा मंत्री रामविलास पासवान यांनी कांदा निर्यातबंदी उठविण्याची घोषणा केली असली, तरी ती कायमस्वरूपी नाही. कांद्यावरील इतर निर्बंध कायमचे हटवून कांदा व्यापारातील सरकारी हस्तक्षेप थांबवा, ही शेतकरी संघटनेची भूमिका आहे. त्यासाठी शरद जोशीप्रणीत शेतकरी संघटनेच्यावतीने आयोजित चांदवड येथे १ मार्च रोजी कांदा परिषद होणारच अशी माहिती संघटनेचे प्रदेशाध्यक्ष अनिल घनवट यांनी दिली. कांद्याचे दर नियंत्रित करण्यासाठी केंद्र शासनाने कांद्याची निर्यात बंद केली, साठवणूक मर्यादा व परदेशातून कांद्याची आयात ही केली आहे. आता कांद्याचे नवीन पीक बाजारात आले आहे, त्यामुळे कांद्याचे भाव कोसळत आहेत. या पार्श्वभूमीवर कांद्याची निर्यात खुली करण्याची घोषणा केंद्र सरकारने केली आहे. निर्यातबंदी हटविण्याची घोषणा झाल्यामुळे कांदा दरातील घसरण सध्या थांबणार आहे. परंतु ही निर्यातबंदी किती काळापुरती आहे. किती टन मर्यादेपर्यंत आहे, कोणत्या वाणाच्या कांद्यासाठी आहे, निर्यात शुल्क किती आकारले जाणार, साठ्यांवरील बंधनाचे काय? या बाबी स्पष्ट नाहीत. या मुद्द्यांवर कांदा उत्पादक शेतकऱ्यांशी चर्चा करून आंदोलनाची दिशा ठरविण्यासाठी १ मार्च रोजी चांदवड येथे कांदा परिषद आयोजित केली असल्याची माहिती श्री. घनवट यांनी दिली.  चांदवड येथे होणाऱ्या या कांदा परिषदेत कांदा पीक, व्यापार, साठवणूक, निर्यात व शासनाचे धोरण या विषयावर सखोल चर्चा करण्यात येणार आहे. सह्याद्री फार्मर प्रोड्युसर कंपनीचे अध्यक्ष विलास शिंदे, कांदा उत्पादक शेतकरी संघटनेचे अध्यक्ष भारत दिघोळे, कांदा उत्पादक शेतकरी संघटनेचे राज्य संपर्कप्रमुख कुबेर जाधव, पश्चिम महाराष्ट्र शेतकरी संघटनेच्या अध्यक्षा सीमाताई नरोडे आदी या वेळी मार्गदर्शन करणार आहेत. शेतकरी संघटनेचे अध्यक्ष अनिल घनवट यांच्या अध्यक्षतेखाली कांदा परिषद होणार आहे. सध्या जगभरात कांद्याचे बाजार चढे आहेत, कांद्याची मागणी आहे; परंतु निर्यातबंदी असल्यामुळे ही संधी हातची जात आहे. कांद्याच्या भावाचा परिणाम फक्त शेतकऱ्यांवरच नाही तर कांदा उत्पादक परिसरातील व्यावसायिकांवर होतो याचा विचार करून सर्वांनी परिषदेत उपस्थित राहून मते मांडावीत व मोठ्या संख्येने उपस्थित राहावे, असे आवाहन शेतकरी संघटनेचे उपाध्यक्ष देविदास पवार, नाशिक जिल्हा शेतकरी संघटनेचे अध्यक्ष अर्जुन बोराडे, स्वतंत्र भारत पक्षाचे जिल्हाध्यक्ष शंकर पुरकर, चांदवड तालुका अध्यक्ष अनंत सादडे, त्रिंबक गांगुर्डे यांनी केले आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com