माण तालुक्यात कांदा काढणी वेगात

गोंदवले, जि. सातारा : निवडणुकीच्या सुगीतच शेतीची सुगी असल्याने उमेदवारांबरोबरच शेतकऱ्यांचीही धामधूम सुरू असल्याचे पाहायला मिळत आहे. माण तालक्यात सध्या कांदा काढणी आणि काटणीच्या कामांना वेग आला आहे. 

विधानसभा निवडणुकीसाठी उमेदवारांनी प्रचारासाठी पायाला भिंगरी बांधली असतानाच माणमध्ये शेतकऱ्यांनी मात्र, कांदा काढणी व काटणीसाठी हाताची भिंगरी केली आहे. सध्या कांद्याबरोबरच मतदारही चांगलाच भाव खात असल्याने चित्र आहे.

प्रत्येक उमेदवार आपापल्या परीने प्रचारात गुंतला आहे. याच धामधुमीत मात्र, शेतकरीवर्ग शेती कामात गुंतला आहे. गेल्या तीन वर्षांत दुष्काळाविरुद्ध शेतकरी झगडत आहे. दुष्काळी परिस्थितीतही मिळेल त्या पाण्यावर शेतकऱ्यांनी शेती करण्याचा प्रयत्न केला. उरमोडीच्या पाण्यानेही कालव्यालगतच्या शेतकऱ्यांना चांगला फायदा झाला. अनेकांनी नगदी पीक असणाऱ्या कांद्याची लागण मोठ्या प्रमाणात केली होती. या तीन महिन्यांच्या कांद्याची काढणी व काटणी सध्या सुरू आहे. 

कांदा काढणीसाठी पुरुषांपेक्षा महिला शेतमजुरांची संख्या मोठी असून, एक पोते कांदा काटणीसाठी साठ ते सत्तर रुपये घेतले जात आहेत. मागणी वाढल्याने कांद्याला चांगला दर मिळत असून, व्यापारी जागेवरून कांदा उचलण्यासाठी गावोगावी फिरताना दिसत आहेत. व्यापारी प्रतिक्विंटल अडीच ते तीन हजार रुपये दर देत आहेत.

यंदा कांद्याला चांगला भाव मिळत असला तरी दुष्काळात पीक जोपासण्यासाठी झालेला खर्चही मोठा आहे. - दत्ता काशीद, शेतकरी, नरवणे