खानदेशात कांद्याच्या दरातील घसरण सुरूच

जळगाव ः खानदेशात लाल कांद्याच्या दरात गेल्या आठवडाभरापासून सतत घसरण सुरू आहे. कमाल दरात क्विंटलमागे ६०० रुपयांची घसरण झाली आहे. किमान ८०० व कमाल २४०० रुपये प्रतिक्विंटलचा दर कांद्याला मिळत आहे. 

कांद्याचा सरासरी दरही दरातील घसरणीने कमी झाला आहे. सध्या सरासरी दर १८०० रुपये प्रतिक्विंटल, एवढा आहे. १५ दिवसांपूर्वी लाल कांद्याचा किमान दर १००० व कमाल दर ३४०० रुपये प्रतिक्विंटल, एवढा होता. त्यात हळूहळू घसरण सुरू झाली. कांद्याच्या आवकेत वाढ होईल, असे संकेत बाजारातून मिळत असतानाच कोरोनामुळे खानदेशात आठवडी बाजार बंद झाले. 

जळगाव जिल्ह्यात ६ मार्चपर्यंत आठवडी बाजार बंद आहेत. बाजार समित्यांमध्ये भाजी, फळे मार्केट यार्डात सोशल डिस्टन्सिगचे पालन केले जात नसल्याचे कारण सांगून कारवाईदेखील झाली. ही कारवाई जळगाव येथे एकदा करण्यात आली. अडतदार, व्यापारी यांना गर्दी न होवू देण्याची ताकीद देण्यात आली. आठवडी बाजार बंद असल्याने बाजारात इतर भाजीपाल्यासह कांदा दरावरही दबाव आला. परिणामी शेतकऱ्यांचे मोठे नुकसान होत आहे. 

आगाप लागवडीच्या कांद्याची काढणी जळगाव, धुळे जिल्ह्यात काही गावांमध्ये सुरू झाली आहे. 

पणन व्यवस्था आक्रसली

काढणीनंतर १७ ते २० दिवसात कांद्याची बाजारात विक्री केली जाते. यातच खानदेशातील पणन व्यवस्था कोरोनामुळे आक्रसली आहे. अशा स्थितीत कांदा उत्पादकांना मोठे नुकसान सहन करावे लागेल, असे दिसत आहे. कांद्याचे सरासरी दर सध्या प्रतिक्विंटल १८०० रुपये आहेत. त्यात पुढे आणखी घसरण होऊ शकते, असे सांगितले जात आहे.