खानदेशात कांदा आवक स्थिर; दरात चढउतार

जळगाव  ः खानदेशातील प्रमुख बाजार समित्यांमध्ये कांद्याची आवक मागील आठ ते १० दिवसांपासून स्थिर आहे. आवक मागील वर्षाच्या तुलनेत कमी आहे. दरात मात्र चढउतार सुरू आहे. यामुळे शेतकऱ्यांमध्ये नाराजी आहे.  ऑक्‍टोबरमध्ये लागवडीच्या कांद्याची काढणी काहीशी उशिराने झाली. या कांद्याची साठवणूक काही शेतकऱ्यांनी करून ठेवली होती. त्याची आवक सुरू आहे. जळगाव, धुळे, चाळीसगाव, साक्री (जि.धुळे), अडावद (ता.चोपडा), किनगाव (ता.यावल) येथील बाजारात कांद्याची आवक स्थिर आहे. या बाजारांमध्ये मिळून रोज सरासरी पाच हजार क्विंटल कांद्याची आवक मागील आठवडाभरात झाली आहे. सर्वाधिक आवक साक्री, जळगाव, अडावद, धुळे येथील बाजारात होत आहे. तर किनगाव, चाळीसगाव बाजारातील आवक कमी झाली आहे. मागील वर्षी जळगावच्या बाजारात डिसेंबर ते जानेवारी या दरम्यान प्रतिदिन सरासरी दोन हजार क्विंटल कांद्याची आवक झाली होती. त्यात पांढऱ्या कांद्याचीदेखील आवक होत होती.  यंदा पाढऱ्या कांद्याची आवक नगण्य अशीच आहे. लाल कांद्याला जळगावच्या बाजारात मागील १० ते १२ दिवसांपासून प्रतिक्विंटल १८०० ते ३५०० रुपये दर मिळत आहे. नोव्हेंबरमध्ये दर नऊ हजार रुपये प्रतिक्विंटलपर्यंत पोचले होते. दर हवे तसे मिळत नसल्याने शेतकऱ्यांमध्ये नाराजी आहे. परंतु कांद्याची १० ते १५ दिवसांपेक्षा अधिक वेळ साठवणूक करता येत नसल्याने त्याची विक्री शेतकरी बाजारात करीत आहेत.  कांद्याची आवक औरंगाबाद, जालना, बुलडाण्यासह जळगाव, चोपडा, भुसावळ, यावल, धुळे, पाचोरा आदी भागातून होत आहे. काही शेतकरी हमीचे दर मिळतील, यासाठी कांद्याची पाठवणूक मध्य प्रदेशातील बडवानी, इंदूर व नाशिक जिल्ह्यातील लासलगावच्या बाजारात करीत आहेत. परंतु तेथेही अपेक्षित दर मिळत नसल्याची स्थिती आहे. मध्य प्रदेशातही कांद्याची तेथील स्थानिक भागातून आवक वाढली आहे, असे सांगण्यात आले.