बीड : केंद्र सरकारने डिसेंबर २०१८ कृषी निर्यात धोरण जाहीर केले. राज्यात कृषी निर्यात धोरणाची अंमलबजावणी करण्यासाठी राज्य कृषी पणन मंडळ काम करते. मराठवाड्यात सीताफळाचे बऱ्यापैकी क्षेत्र आहे. त्यामुळे येथून सिताफळाची निर्यात वाढावी, यासाठी कृषी विद्यापीठातील शास्त्रज्ञ, कृषी विभागाचे अधिकारी, पणन मंडळाचे अधिकारी, शेतकरी उत्पादक कंपन्यांनी ऑनलाइन बैठकीत विचारमंथन केले.
पणन मंडळातर्फे या बैठकीचे आयोजन करण्यात आले. जिल्हा अधीक्षक कृषी अधिकारी डी. जी. मुळे, कृषी पणन मंडळाचे निर्यात व्यवस्थापक सतीश वराडे, सहायक सरव्यवस्थापक देशांतर्गत व्यापार विकास विभागाचे मंगेश कदम, अंबाजोगाई केव्हीकेचे शास्त्रज्ञ डॉ. नरेंद्र जोशी, केव्हीके सोलापूरचे डॉ. विकास भिसे, प्रभारी उपसरव्यवस्थापक संजय शेळके, फलोत्पादन विकास अधिकारी गणेश पाटील, कृषी व्यवसाय पणन तज्ज्ञ कुलदीप काळे आदी उपस्थित होते.
पाटील यांनी सीताफळ निर्यात धोरण स्पष्ट केले. मॅग्नेट प्रकल्पामध्ये सीताफळ पिकाचा समावेश आहे. बीड येथे होत असलेल्या नियोजित सीताफळ प्रक्रिया प्रकल्पाबाबत माहिती दिली.
मुळे यांनी निर्यात वाढीसाठी कृषी विभागाकडून सुरू असलेल्या प्रयत्नाची माहिती दिली. मार्गदर्शनानंतर शेतकऱ्यांच्या प्रश्‍नांची उत्तरे तज्ज्ञांनी दिली. शेळके यांनी आभार मानले. कृषी पणन मंडळाचे कार्यकारी संचालक सुनील पवार व सरव्यवस्थापक दीपक शिंदे यांच्या मार्गदर्शनाखाली बैठक झाली.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.