नाशिक जिल्हा बॅंकेकडून ६४ टक्केच पीक कर्जवाटप

नाशिक : चालू वर्षीच्या खरीप हंगामासाठी अग्रणी बँकेने नाशिक जिल्हा मध्यवर्ती सहकारी बँकेला ४३७ कोटी रुपयांचा लक्ष्यांक दिला होता. मात्र पैशांची तरतूद नसल्याने सुरुवातीला कर्जवितरण करण्यात अडचणी आल्या. त्यानंतर महात्मा जोतीराव फुले कर्जमुक्ती योजनेद्वारे रक्कम बँकेकडे वर्ग झाली. सोमवार (ता.२४) अखेर ६४ टक्के कर्जवितरण झाल्याची माहिती बँकेतर्फे देण्यात आली. 

जिल्ह्यात खरीप पीक कर्जवाटप अडकून पडले. मागील महिन्यात जिल्हा बँकेला महात्मा जोतिराव फुले शेतकरी कर्जमाफी योजनेद्वारे ८७० कोटी रुपये वर्ग झाले आहेत. त्यामुळे पीककर्ज वितरणाच्या कामात गती आली. त्यामुळे आतापर्यंत २७९.२१ कोटी रुपयांचे कर्ज वितरण झाले. यासंदर्भात राज्य शासनाकडून सातत्याने पाठपुरावा सुरु आहे. नुकतीच सहकारमंत्र्यांनी व्हिडीओ कॉन्फ्रसद्वारे सहकार विभागाचे अधिकारी तसेच जिल्हा बॅंकेच्या अधिकाऱ्यांशी चर्चा केली.त्यात कर्ज वितरणास गती देण्याच्या सूचना करण्यात आल्या होत्या. त्यामुळे सर्वच यंत्रणा गतिमान झाल्याने ही आकडेवारी वाढत असल्याचे आकडेवारीनुसार दिसून येत आहे. 

१ एप्रिलपासून खरीप पीककर्ज वितरण सुरू झाले. सर्वाधिक वाटप निफाड तालुक्यात झाले. सर्वात कमी वितरण सुरगाणा तालुक्यात आहे. मात्र अजूनही चांदवड, नांदगाव, त्र्यंबकेश्वर, सटाणा, कळवण तालुक्यात कामकाजात गती येणे अपेक्षित आहे. यात गती येऊन बँकेने अजूनही जे अर्ज करत आहेत, त्यांना तातडीने कर्ज द्यावे, अशी मागणी करण्यात येत आहे.