शेळ्या-मेंढ्यांचे बाजार सुरु करा  

नगर ः सध्या आषाढ महिना सुरु असून या महिन्यात ग्रामीण भागात शेळ्या-मेंढ्यांच्या खरेदी विक्रीतून आठवडी बाजारात व्यवहार होतात. यंदा मात्र ‘कोरोना’मुळे हे व्यवहार बंद आहेत. मात्र त्यामुळे शेतकऱ्यांचे नुकसान होत असून हे नुकसान टाळण्यासाठी ‘कोरोना’बाबतचे सर्व नियम पाळून राज्यात शेळ्या-मेंढ्यांचे खरेदी - विक्री व्यवहार सुरु करावेत, अशी मागणी नगर जिल्हा शेळीपालन व प्रक्रिया सहकारी संघाचे अध्यक्ष अशोक काळे यांनी केली आहे.  काळे यांनी दिलेल्या निवेदनात म्हटले आहे, की  ग्रामीण भागामध्ये शेळ्या-मेंढ्यांच्या खरेदी-विक्रीतून शेतकरी, कष्टकरी,  कामगारांचे आर्थिक व्यवहार होतात. अनेकांचा बाजार हाटही शेळ्या-मेंढ्यांच्या खरेदी-विक्रीवरच अवलंबून आहे. शेळ्या मेंढ्यांच्या विक्रीतून मोठी आर्थिक उलाढाल होते. आता १६ जुलैला आषाढी अमावस्या व १ ऑगस्टला बकरी ईद आहे.  या काळात शेळ्या-मेंढ्यांना मोठ्या प्रमाणात मागणी असते. दरवर्षी याकालावधीत दरही चांगले मिळतात. महिनाभरात चार ते पाच दिवस हे बाजार भरतात. अनेक शेतकरी आषाढ महिन्यात आणि बकरी ईदच्या कालावधीत शेळ्या-मेंढ्यांची विक्री करता यावी, यासाठी अन्य काळात शेळ्या, मेंढ्या, बोकड विक्री करत नाहीत. आता विक्री करण्याची वेळ आलेली असतानाच ‘कोरोना’ संसर्गाच्या पार्श्‍वभूमीवर गेल्या चार ते पाच महिन्यांपासून बाजार बंद असल्याने शेळ्या- मेंढ्या खरेदी-विक्री पूर्णतः बंद आहे. त्यामुळे शेतकऱ्यांची मोठ्या प्रमाणात आर्थिक कोंडी झाली आहे. त्यामुळे शासनाने आता ‘कोरोना’च्या अनुषंगाने अटींच्या अधीन राहून हे बाजार तातडीने सुरू करावेत, अशी मागणी श्री. काळे यांनी केली आहे.