कर्जासाठी शेतकऱ्याचा बॅंकेसमोर मृत्यू होणे लांच्छनास्पद : विखे पाटील

मुंबई : कर्जाच्या मागणीसाठी शेतकऱ्यांना स्टेट बॅंकेसमोर उपोषणाला बसावे लागते आणि आंदोलनादरम्यान एका शेतकऱ्याचा मृत्यू होतो, हा प्रकार सरकारसाठी लांच्छनास्पद असल्याचे विधानसभेचे विरोधी पक्षऩेते राधाकृष्ण विखे पाटील यांनी म्हटले आहे. पाथरी येथे नवीन कर्जाच्या मागणीसाठी स्टेट बॅंकेसमोर सुरू असलेल्या आंदोलनात तुकाराम वैजनाथ काळे नामक शेतकऱ्याचा मृत्यू झाला. या घटनेसंदर्भात प्रतिक्रिया व्यक्त करताना ते बोलत होते. सरकारच्या धोरणांमुळे दिल्लीपासून गल्लीपर्यंत नैराश्य निर्माण झाले आहे. सरकारच्या उदासीन व नकारात्मक धोरणांमुळे हतबल होऊन तिकडे नवी दिल्लीत रिझर्व्ह बॅंकेच्या चेअरमनला देखील राजीनामा द्यावा लागत असून, पाथरीत शेतकऱ्यांना आंदोलन करून हौतात्म्य पत्करावे लागत असल्याची संतप्त प्रतिक्रिया त्यांनी व्यक्त केली. सरकारकडून भरीव मदत मिळत नसल्याने शेतकऱ्यांमध्ये कमालीचे नैराश्य निर्माण झाले आहे. कर्जमाफी, दीडपट हमीभाव आणि जलयुक्त शिवारसारख्या घोषणा दिलासादायक ठरल्या असत्या, तर शेतकरी आत्महत्येचे प्रमाण कमी होताना दिसले असते. पण दुर्दैवाने आजची परिस्थिती तशी नाही. सरकारने या गंभीर घटनेची तातडीने दखल घेऊन शेतकऱ्यांना कर्जासाठी आंदोलनास करण्यास भाग पाडणाऱ्या दोषी अधिकाऱ्यांविरुद्ध कारवाई करावी, संबंधित शेतकऱ्यांना तातडीने कर्ज उपलब्ध करून द्यावे आणि तुकाराम वैजनाथ काळे यांच्या कुटुंबीयांना आर्थिक मदत करावी, अशीही मागणी विरोधी पक्षनेत्यांनी केली.