अर्थसंकल्पावेळी विरोधकांचा सभात्याग

मुंबई : अर्थसंकल्प विधिमंडळात सादर होण्याआधीच बाहेर पडला असून, हा दोन्ही सभागृहांचा आणि सदस्यांचा अपमान आहे. त्यामुळे अर्थमंत्र्यांनी राजीनामा द्यावा, अशी मागणी विधान परिषदेचे विरोधी पक्षनेते धनंजय मुंडे यांनी विधान परिषदेत केली.

लोकशाहीला काळिमा फासणारी ही घटना आहे. महाराष्ट्राच्या इतिहासात पहिल्यांदा अर्थसंकल्प फोडण्यात आला आहे, असा थेट आरोपही धनंजय मुंडे यांनी केला. अर्थमंत्री सभागृहात अर्थसंकल्प मांडत असताना अर्थमंत्र्यांच्या ट्विटर हँडलवरून अर्थसंकल्पातील गोष्टी ट्विट केल्या जात होत्या. या गोष्टी जाहिरातीसह ट्विटवर प्रसिद्ध केल्या जात होत्या. याचा अर्थ याअगोदरच अर्थसंकल्प अर्थमंत्र्यांच्या सोशल मीडिया हँडल करणाऱ्या टीमच्या हाती लागला होता, अशी माहिती धनंजय मुंडे यांनी सभागृहात पुराव्यानिशी सादर केली. या वेळी अर्थसंकल्प सादर करतानाच तो सोशल मीडियावर कसा येऊ शकतो, असा सवाल त्यांनी केला.

दरम्यान, हाच मुद्दा उपस्थित करीत विधानसभेत विरोधी पक्षाच्या सदस्यांनी जोरदार आक्षेप घेतला. याच मुद्द्यावर विरोधकांनी अर्थसंकल्प सुरू असतानाच सभात्याग केला. महाराष्ट्राच्या इतिहासात अर्थसंकल्प सादर होण्याआधीच सोशल मीडियाच्या माध्यमातून प्रकाशित करण्याचे काम यापूर्वी कधी झाले नव्हते, अशा शब्दांत राष्ट्रवादी काँग्रेसचे विधिमंडळ गटनेते जयंत पाटील यांनी सरकारवर ताशेरे ओढले.