परभणीत ४७१ हेक्टरवर फळबाग लागवड

परभणी ः महात्मा गांधी राष्ट्रीय ग्रामीण रोजगार हमी योजनेअंतर्गत (मनरेगा) सन २०२०-२१ मध्ये परभणी जिल्ह्यात ६४६ शेतकऱ्यांनी ४७१.४८ हेक्टरवर विविध फळपिकांची लागवड केली आहे. फळबाग लागवडीच्या कामांवर १ कोटी ६६ लाख ७३ हजार रुपये खर्च झाला आहे, अशी माहिती सूत्रांनी दिली.

मनरेगाअंतर्गत सन २०२०-२१ या वर्षासाठी जिल्ह्यात ५८४ हेक्टरवर फळबाग लागवडीचे उद्दिष्ट होते. परंतु जिल्ह्यातील २ हजार ८७ शेतकऱ्यांचे १ हजार ५२०.८० हेक्टरवर फळबाग लागवडीसाठी संमती अर्ज प्राप्त झाले. त्यापैकी २ हजार ६२ शेतकऱ्यांना १ हजार ५०४.८२ हेक्टरवर फळबाग लागवडीसाठी तांत्रिक मंजुरी तर २ हजार २८ शेतकऱ्यांना १ हजार ४७६३.१ हेक्टरवर फळबाग लागवडीसाठी प्रशासकीय मंजुरी देण्यात आली. त्यापैकी ६६५ शेतकऱ्यांनी ४८३.२८ हेक्टरवर फळबाग लागवडीसाठी खड्डे खोदले होते. परंतु त्यापैकी ६३६ शेतकऱ्यांनी ४७१.४८ हेक्टरवर फळबाग लागवड केली आहे.

या अंतर्गतच्या कामांवर १ कोटी ६६ लाख ७३ हजार रुपये एवढा खर्च झाला आहे. यावर्षीच्या फळपीकनिहाय लागवड क्षेत्रात संत्र्यांची २४५ शेतकऱ्यांनी १९६.५० हेक्टर लागवड केली आहे. मोसंबीची २३ शेतकऱ्यांनी १९.४० हेक्टरवर, लिंबाची १०९ शेतकऱ्यांनी ७१.३१ हेक्टरवर, पेरूची १०८ शेतकऱ्यांनी ६७.६० हेक्टरवर, सीताफळाची ९१ शेतकऱ्यांनी ६५.९० हेक्टरवर, चिकूची १२ शेतकऱ्यांनी ९.९५ हेक्टरवर, आंब्याची ५६ शेतकऱ्यांनी ३९.०२ हेक्टरवर लागवड केली आहे.

डाळिंबाची २ शेतकऱ्यांनी १.८० हेक्टरवर लागवड केली आहे. मानवत तालुक्यात सर्वाधिक क्षेत्रावर तर पालम तालुक्यात सर्वात कमी क्षेत्रावर फळबाग लागवड झाली आहे. संत्रा फळपिकांचे लागवड क्षेत्र सर्वाधिक तर डाळिंबाचे क्षेत्र सर्वात कमी आहे, असे सूत्रांनी सांगितले.