सोलापूर जिल्ह्यात पिकांच्या पंचनाम्यांचे आदेश

सोलापूर : जिल्ह्यात गेल्या दोन दिवसांपासून सलग पाऊस झाला. या पावसामुळे खरिपातील मूग, उडीद भिजला, तर ऊस, कांदा, डाळिंब पिकांचेही मोठे नुकसान झाले. प्रामुख्याने माळशिरस, पंढरपूर आणि सांगोला तालुक्याला त्याचा सर्वाधिक फटका बसला. या नुकसानीचे पंचनामे करण्याचे आदेश जिल्हाधिकारी मिलिंद शंभरकर यांनी दिले. आठवडाभरात या पंचनाम्याचे अहवाल देण्यास सांगितले आहे. 

होटगी (ता. दक्षिण सोलापूर) तलाव भरल्याने सांडव्यातून पाणी वाहत आहे. अक्कलकोट तालुक्यातील चुंगी, मंगळवेढा तालुक्यातील मारापूर, सांगोला तालुक्यातील तिप्पेहळ्ळी, अनकढाळ, वझरे, मिसाळवाडी, राजुरी, वाटंबरे, एखतपूर या भागात डाळिंब, कांदा भाजीपाला पिकासह अनेक ठिकाणी घरांची पडझड झाली आहे.

पंढरपूर तालुक्यातही पावसामुळे शेतीचे मोठे नुकसान झाले आहे. पंढरपुरातील कासेगाव, खर्डी येथील द्राक्ष, डाळिंब बागांचे नुकसान झाले आहे. 

जमीन खरडली, उडीद, मूग भिजला

पावसामुळे अनेकांच्या शेतातील माती वाहून गेली आहे. त्याशिवाय उपरी, सुपली, पळशी येथेही दमदार पावसाने शेतीचे नुकसान झाले. अनेकांचा काढलेला मूग, उडीद भिजून गेला. माळशिरस तालुक्यातही वेळापूर, माळशिरस, निमगाव, मळोली, अकलूज भागात चांगला पाऊस झाला. या भागातही डाळिंबासह ऊसाचे नुकसान झाले. दरम्यान, आता या सर्व नुकसानीचे पंचनामे करावेत, असे आदेश जिल्हाधिकारी शंभरकर यांनी तहसिलदारांना दिले आहेत. येत्या आठ दिवसांत त्याबाबतचा अहवाल द्यावा, असेही त्यांनी म्हंटले आहे.