`गोकुळ'चे पाणी, वीज तोडण्याचे आदेश

`गोकुळ'चे पाणी, वीज तोडण्याचे आदेश
`गोकुळ'चे पाणी, वीज तोडण्याचे आदेश

कोल्हापूर ः तृत्तीय व चतुर्थ संवर्गातील कर्मचाऱ्यांत प्रकल्पबाधित कर्मचाऱ्यांची माहिती न दिल्याने ऐन निवडणुकीच्या तोंडावर कोल्हापूर जिल्हा दूध उत्पादक संघाच्या (गोकुळ) मुख्य कार्यालयासह ताराबाई पार्कातील कार्यालयाचे पाणी व वीजपुरवठा तोडण्याचे आदेश अपर जिल्हाधिकारी नंदकुमार काटकर यांनी दिले. ही कारवाई एक फेब्रुवारीपासून होणार असून, या निर्णय जिल्ह्याच्या राजकारणात एकच खळबळ उडाली आहे.  स्थानिक स्वराज्य संस्थांसह शासनाचे सहाय्य घेतलेल्या सहकारी संस्थांत वर्ग तीन व चारच्या कर्मचाऱ्यांत प्रकल्पग्रस्तांसाठी पाच टक्के जागा राखीव ठेवणे कायद्याने बंधनकारक आहे. नव्याने भरती करण्यात येणाऱ्या कर्मचाऱ्यांत प्रकल्पग्रस्तांसाठी पाच टक्के जागा आरक्षित ठेवण्याचे आदेश शासनाने दिले आहेत. शासनाच्या अध्यादेशानुसार ‘गोकुळ'' ला माहिती सादर करण्याचे आदेश श्री. काटकर यांनी यापूर्वीच दिले होते. याविरोधात संघाच्यावतीने उच्च न्यायालयात याचिका दाखल केली होती. तथापि ही याचिका १ फेब्रुवारी २०१९ रोजी फेटाळून अपर जिल्हाधिकारी यांनी मागितलेली माहिती देण्याचे निर्देश न्यायालयाने दिले होते. त्यानंतर ही माहिती न दिल्याबद्दल संघाला नोटीसही बजावण्यात आली होती.  ‘गोकुळ'' चे कार्यकारी संचालक डी. व्ही. घाणेकर यांनी त्यावर १३ ऑगस्ट २०१८ रोजी सादर केलेल्या लेखी म्हणण्यानुसार नव्याने भरती केली नसल्याचे सांगितले होते. भविष्यात नोकर भरती करताना याची अंमलबजावणी करण्याचे आश्‍वासन दिले होते. म्हणून कोणतीही कारवाई संघावर करू नये, असे या खुलाशात म्हटले होते. तथापि अपर जिल्हाधिकारी यांनी सध्या कार्यरत असलेल्या "गोकुळ''च्या कर्मचाऱ्यांची माहिती मागवून त्यात प्रकल्पग्रस्तांची संख्या किती आहे, अशी लेखी विचारणा केली होती. तरीही संघाने ही माहिती दिली नव्हती म्हणून यावर १४ नोव्हेंबर २०१९ रोजी सुनावणी घेण्यात आली. त्यात संघाच्यावतीने ॲड. लुईस शहा यांनी लेखी म्हणणे सादर केले. त्यानंतर अनेकदा यावर सुनावणी झाली. 

अंतिम सुनावणी ३० डिसेंबर २०१९ रोजी झाली. त्यात ॲड. शहा यांनी ‘गोकुळ'' ने कोणत्याही कायद्याचे उल्लंघन केले नसल्याची माहिती दिली. तरीही या कार्यालयाने मागितलेली आवश्‍यक ती माहिती देण्यास पुरेसा वेळ देऊन ‘गोकुळ'' ने ही माहिती दिली नव्हती. यावरून संघात प्रकल्पग्रस्तांची भरतीच झाली नसल्याची बाब समोर आली. या संदर्भातील कायदेशीर बाबींचे उल्लंघन केल्याचा ठपका ठेवून ‘गोकुळ'' च्या गोकुळ शिरगाव व ताराबाई पार्कातील कार्यालयाचा वीज व पाणीपुरवठा खंडित करण्याचे आदेश श्री. काटकर यांनी दिले. या आदेशाची अंमलबजावणी करण्याचे आदेश महावितरण व जलसंपदा विभागाच्या कार्यकारी अभियंत्यांना दिले आहेत.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com